નવી દિલ્હી : કોંગ્રેસ નેતા રાહુલ ગાંધી દ્વારા મુખ્ય ચૂંટણી કમિશનર (CEC) જ્ઞાનેશ કુમાર વિરુદ્ધ અપનાવવામાં આવેલા આક્રમક વલણ અને 'મત ચોરી'ના કથિત આરોપોને લઈને સુપ્રીમ કોર્ટ તરફ કાઢવામાં આવેલી કૂચ વચ્ચે રાજકીય પક્ષો વચ્ચે શાબ્દિક યુદ્ધ તેજ થઈ ગયું છે. જનતા દળ (યુનાઇટેડ) એટલે કે JD(U) એ સોમવારે કોંગ્રેસ નેતા રાહુલ ગાંધીની આકરી ટીકા કરતા સ્પષ્ટ શબ્દોમાં જણાવ્યું હતું કે માત્ર ચૂંટણી પંચની ટીકા કરવાથી કે અપશબ્દો બોલવાથી ચૂંટણીઓ જીતી શકાતી નથી.

જેડીયુના રાષ્ટ્રીય પ્રવક્તા રાજીવ રંજન પ્રસાદે મીડિયા સાથેની વાતચીતમાં જણાવ્યું હતું કે લોકશાહીમાં અભિવ્યક્તિની સ્વતંત્રતા, અસંમતિ અને અરાજકતા વચ્ચે સ્પષ્ટ તફાવત હોય છે, જે વાત રાહુલ ગાંધી અને સમગ્ર વિપક્ષે સમજવાની તાતી જરૂર છે. તેમણે કટાક્ષ કર્યો હતો કે ચૂંટણીમાં વિજય મેળવવા માટે માત્ર ચૂંટણી પંચ પર આરોપો મૂકવા પૂરતા નથી, પરંતુ નેતાઓએ જનતાની વચ્ચે જઈને જમીની સ્તરે સખત મહેનત કરવી પડે છે.

કોંગ્રેસ પાર્ટીની વર્તમાન સ્થિતિ પર સવાલ ઉઠાવતા પ્રસાદે દાવો કર્યો હતો કે આઝાદીની લડાઈમાં મહત્વની ભૂમિકા ભજવનાર કોંગ્રેસ પક્ષ રાહુલ ગાંધીના નેતૃત્વ હેઠળ સતત સંકોચાઈ રહ્યો છે. છેલ્લા ત્રણ લોકસભા ચૂંટણીથી પાર્ટી ૧૦૦ બેઠકોનો આંકડો પાર કરવામાં નિષ્ફળ રહી છે અને અનેક રાજ્યોમાં તેનો જનાધાર સતત ઘટતો ગયો છે. કોંગ્રેસ પક્ષ પોતે જે રાજ્યોમાં સત્તામાં છે ત્યાં પણ આંતરિક અસંતોષનો સામનો કરી રહી હોવાનું તેમણે ઉમેર્યું હતું.

જેડીયુ નેતાએ વધુમાં જણાવ્યું હતું કે હિમાચલ પ્રદેશ અને કર્ણાટક જેવા રાજ્યોમાં કોંગ્રેસ સરકારો મુશ્કેલીઓમાં ઘેરાયેલી છે, જ્યારે પંજાબ અને ઉત્તર પ્રદેશ જેવા વિપક્ષી રાજ્યોમાં પાર્ટી ભારે આંતરિક જૂથબંધીનો શિકાર બની છે. રાહુલ ગાંધીની દૂરંદેશીના અભાવ અને પાર્ટીની આંતરિક નિષ્ફળતાઓથી ધ્યાન ભટકાવવા માટે જ કોંગ્રેસ નેતૃત્વ દ્વારા ચૂંટણી પંચને નિશાન બનાવવામાં આવી રહ્યું છે, તેમ તેમણે આક્ષેપ કર્યો હતો.