રુદ્રપ્રયાગ: તા.૧૮: ઉત્તરાખંડના હિમાલયની ગોદમાં આવેલું પવિત્ર કેદારનાથ ધામ છોટા ચાર ધામ યાત્રાનું એક અત્યંત મહત્વપૂર્ણ કેન્દ્ર છે. દર વર્ષે દેશ-વિદેશમાંથી લાખો શ્રદ્ધાળુઓ બાબા બર્ફાની અને મહાદેવના દર્શન માટે અહીં પહોંચે છે. ગૌરીકુંડથી શરૂ થતો ૧૭ થી ૧૯ કિલોમીટરનો આકરો ચઢાણ પાર કરવા માટે ઘણા લોકો પોતાની શારીરિક ક્ષમતાના અભાવે ઘોડા અને ખચ્ચરોનો સહારો લે છે. પરંતુ, આ આસ્થાની સફર પાછળ મૂંગા પશુઓ પર ગુજારવામાં આવતી ગંભીર ક્રૂરતાનું એક કાળું સત્ય ફરી એકવાર સામે આવ્યું છે, જેણે સોશિયલ મીડિયા પર એક મોટો વિવાદ છેડી દીધો છે.
વાયરલ વીડિયોએ હચમચાવી દીધા ઇન્ટરનેટ યુઝર્સ
તાજેતરમાં કેદારનાથ ટ્રેક પરથી એક પ્રવાસી દ્વારા શૂટ કરવામાં આવેલો વીડિયો ઝડપથી વાયરલ થઈ રહ્યો છે. આ વીડિયોમાં કેદારનાથ મંદિરના બેકગ્રાઉન્ડ સાથે જોઈ શકાય છે કે, કેટલાક માણસોનું જૂથ એક મૃત ઘોડાને તેના પગથી પકડીને પથરાળ રસ્તા પર ઘસડીને લઈ જઈ રહ્યું છે. વીડિયો બનાવનાર વ્યક્તિ ખૂબ જ ભીની આંખે કહી રહ્યો છે, "જુઓ, કેદારનાથમાં પશુઓની આ હાલત છે. જો તમારા પગમાં તાકાત હોય તો જ કેદારનાથ આવો. જો તમે કોઈ મૂંગા પશુના જીવના જોખમે કે તેને મારીને ભગવાનના દર્શન કરી રહ્યા છો, તો તમે પાપ કમાઈ રહ્યા છો કે પુણ્ય, એ તમે જ નક્કી કરો. મહાદેવ બધું જોઈ રહ્યા છે."
અતિશય થાક, રોગચાળો અને બેદરકારી બને છે મોતનું કારણ
આ કોઈ પહેલી ઘટના નથી, દર વર્ષે યાત્રા દરમિયાન પશુઓના મોતના સેંકડો કિસ્સાઓ પ્રકાશમાં આવે છે. ક્ષમતા કરતાં વધુ વજન લાદવું, ૨૪ કલાક આકરા ચઢાણ પર સતત દોડાવવું, પૂરતો પૌષ્ટિક ખોરાક અને આરામ ન આપવો વગેરેના કારણે આ મૂંગા જીવો ‘અશ્વ ઇન્ફલ્યુએન્ઝા’ (Equine Influenza) જેવા જીવલેણ ચેપી રોગોનો ભોગ બને છે. પશુ કલ્યાણ સંસ્થાઓ દ્વારા વારંવાર અવાજ ઉઠાવવા છતાં વહીવટી તંત્રના સ્તરે કોઈ નક્કર પગલાં લેવાયા ન હોવાનો આક્રોશ સ્થાનિકો અને પ્રવાસીઓમાં જોવા મળી રહ્યો છે.
નેટીઝન્સનો રોષ: "આ તમારી યાત્રા છે, પશુઓની નહીં!"
આ હૃદયદ્રાવક વીડિયો સામે આવ્યા બાદ સોશિયલ મીડિયા પર લોકોનો ગુસ્સો ફાટી નીકળ્યો છે.
•    nitesh_me247 નામના યુઝરે લખ્યું, "જેટલી શરીરમાં શક્તિ હોય એટલી જ ભક્તિ રાખો. કોઈ પશુને તકલીફ આપવી એ ઘોર પાપ છે."
•    PROTECT ALL WILDLIFE સંસ્થાએ પ્રતિક્રિયા આપતા કહ્યું, "પ્રાણીઓ આપણી જાગીર નથી કે આપણે આપણી સુવિધા માટે તેમનો દુરુપયોગ કરીએ અને તેમને મરવા માટે છોડી દઈએ."
•    અન્ય એક યુઝરે આકરા શબ્દોમાં કહ્યું, "આ તમારી ધાર્મિક યાત્રા છે, ઘોડાઓની નહીં! જો મંદિર જવું હોય તો પોતાના દમ પર ચાલીને જાઓ, ધર્મના નામે આવી ક્રૂરતા બંધ થવી જોઈએ."
પંચ કેદારનું પવિત્ર ધામ
મંદાકિની નદીના કિનારે, સમુદ્ર સપાટીથી હજારો ફૂટની ઊંચાઈએ આવેલું કેદારનાથ ધામ ભગવાન શિવના આદરણીય પંચ કેદાર સ્વરૂપોમાંનું એક છે. પ્રાકૃતિક સુંદરતા અને આધ્યાત્મિક ઉર્જાથી ભરપૂર આ પવિત્ર સ્થળની ગરિમા અને ત્યાં રહેલા જીવો પ્રત્યે કરુણા જાળવવી એ દરેક સાચા ભક્તની ફરજ હોવી જોઈએ, તેવો સુર હાલમાં ઇન્ટરનેટ પર ગુંજી રહ્યો છે.