લંડન: બ્રિટનમાં સિમ-સ્વેપિંગ જેવી જટિલ સાયબર છેતરપિંડી આચરીને કરોડો રૂપિયાની ક્રિપ્ટોકરન્સી ચોરી કરનારા 25 વર્ષીય યુવકને લંડનની અદાલતે અઢી વર્ષની જેલની સજા ફટકારી છે. આરોપીએ ચાર પીડિતોના ખાતાઓમાંથી આશરે રૂ.25.6 મિલિયન (રૂ.રૂ.2.56 કરોડ) મૂલ્યની ક્રિપ્ટોકરન્સી પર હાથ સાફ કર્યો હતો. સિટી ઓફ લંડન પોલીસ દ્વારા હાથ ધરાયેલી તપાસમાં સામે આવ્યું હતું કે આંતરરાષ્ટ્રીય સાયબર સિન્ડિકેટ સાથે મળીને આચરવામાં આવેલા આ ગુનામાં આરોપીએ ટેકનોલોજીનો દુરુપયોગ કરીને મોટી રકમ પચાવી પાડી હતી.
ગુનેગારની ઓળખ અજય શિંજિન ઉર્ફે એજે માર્લી ક્રુઝ તરીકે થઈ છે. સિટી ઓફ લંડન પોલીસના સત્તાવાર અહેવાલ મુજબ, ચોરાયેલા વિશાળ ભંડોળમાંથી શિંજિનને પોતાના હિસ્સા તરીકે £44,000 થી વધુની રકમ મળી હતી. આ કાળી કમાણીથી તેણે લંડનના અત્યંત પોશ અને મોંઘા કેનેરી વ્હાર્ફ વિસ્તારમાં વૈભવી એપાર્ટમેન્ટ ભાડે રાખ્યું હતું. એટલું જ નહીં, તેણે આ નાણાંનો ઉપયોગ દુબઈમાં આલીશાન વેકેશન માણવા તેમજ પોતાના દાંત પર સોનાથી ઢંકાયેલી ખાસ ગ્રીલ ખરીદીને લક્ઝુરિયસ લાઈફસ્ટાઈલ જીવવા માટે કર્યો હતો.
તપાસ દરમિયાન પોલીસને શિંજિનની શંકાસ્પદ નાણાકીય પ્રવૃત્તિઓ અને અચાનક બદલાયેલી રહનસહન અંગે સુરાગ મળ્યા હતા, જેના આધારે ટેકનિકલ સર્વેલન્સ ગોઠવીને તેની ધરપકડ કરવામાં આવી હતી. સિમ-સ્વેપિંગ પદ્ધતિમાં ગુનેગારો પીડિતના મોબાઈલ નંબરનું નકલી સિમકાર્ડ મેળવીને બેંક અને ક્રિપ્ટો એકાઉન્ટ્સના ઓટીપી (OTP) એક્સેસ કરી લેતા હોય છે. શિંજિન સામેના તમામ પુરાવા મજબૂત સાબિત થતાં લંડન અદાલતે તેને કાનૂની સજા સંભળાવી હતી.

સાઇબર ગુનાઓ સામે બ્રિટિશ પોલીસની આ કડક કાર્યવાહી બાદ હવે બ્રિટિશ સાયબર ક્રાઈમ યુનિટ આ સિન્ડિકેટમાં સામેલ અન્ય વિદેશી હેકર્સ અને સાગરીતો સુધી પહોંચવા માટે આંતરરાષ્ટ્રીય એજન્સીઓ સાથે મળીને વધુ તપાસ ચલાવી રહી છે. આ ઉપરાંત, પીડિતોની ચોરાયેલી ક્રિપ્ટોકરન્સીમાંથી રિકવર થયેલી રકમ પરત અપાવવા અને સાયબર સુરક્ષાના નિયમો વધુ સખત બનાવવા માટે કાનૂની પ્રક્રિયા આગળ વધારવામાં આવી રહી છે.રૂ.