નવી દિલ્હી : દેશભરમાં ઇસ્લામિક કેલેન્ડરના સૌથી પવિત્ર તહેવારોમાંના એક ગણાતા બકરીદ અથવા ઈદ-ઉલ-અઝહાની ઉજવણીની તારીખ નક્કી કરવામાં આવી છે. આ વર્ષે ભારતમાં બકરીદ ૨૮ મે, ગુરુવારના રોજ મનાવવામાં આવશે. ધાર્મિક કેલેન્ડર મુજબ, આ તહેવાર સામાન્ય રીતે ચાંદ દેખાયાના ૧૦ દિવસ પછી ઉજવવામાં આવે છે. જામા મસ્જિદના શાહી ઈમામે ૧૭ મે, રવિવારે ચાંદ ન દેખાયાની અને સોમવારે ચાંદ દેખાયાની પુષ્ટિ કરી હતી, જેના આધારે આ તારીખ નક્કી થઈ છે.

ચાંદ દેખાયાના બીજા દિવસથી ઇસ્લામિક કેલેન્ડરના ૧૨મા અને છેલ્લા મહિના જુલ હજ્જની શરૂઆત થાય છે. આ મહિનો અત્યંત મહત્વનો માનવામાં આવે છે કારણ કે તેમાં મક્કામાં વાર્ષિક હજ યાત્રાનું સમાપન પણ થાય છે. ઇસ્લામિક માન્યતા મુજબ, આ મહિનાના પ્રથમ ૧૦ દિવસો ખૂબ જ પવિત્ર ગણાય છે, જેમાં મુસ્લિમ સમુદાયના લોકો પ્રાર્થના, દાન અને રોઝા રાખવામાં વ્યસ્ત રહે છે.

બકરીદની ઉજવણીનો ઇતિહાસ પયગંબર ઇબ્રાહિમના વિશ્વાસ અને ભક્તિ સાથે જોડાયેલો છે. પરંપરા મુજબ, આ તહેવાર પયગંબર ઇબ્રાહિમની અલ્લાહના આદેશનું પાલન કરવાની તૈયારીને યાદ કરે છે. આ દિવસની ઉજવણીના ભાગરૂપે કુર્બાનીની પરંપરાનું પાલન કરવામાં આવે છે, જેમાં ઘેટાં, બકરા અથવા અન્ય પ્રાણીઓની કુર્બાની આપવામાં આવે છે.

કુર્બાનીના માંસને ત્રણ સમાન ભાગોમાં વહેંચવામાં આવે છે. તેનો એક ભાગ પરિવાર માટે, બીજો ભાગ સંબંધીઓ અને મિત્રો માટે તથા ત્રીજો ભાગ ગરીબો અને જરૂરિયાતમંદો માટે અનામત રાખવામાં આવે છે. આ પરંપરા સામાજિક એકતા અને દાનની ભાવનાને પ્રોત્સાહન આપે છે. સમગ્ર દેશમાં લોકો આ તહેવારની તૈયારીઓમાં જોડાયા છે.

નોંધપાત્ર છે કે સાઉદી અરેબિયા, સંયુક્ત આરબ અમીરાત અને પાકિસ્તાન જેવા દેશોમાં ૧૮ મેથી જુલ હજ્જ મહિનાની શરૂઆત થઈ ગઈ હતી, તેથી ત્યાં બકરીદ ભારતના એક દિવસ પહેલા એટલે કે ૨૭ મેના રોજ ઉજવવામાં આવશે. ભારતમાં મુસ્લિમ સમુદાય દ્વારા ૨૮ મેના રોજ આ તહેવાર પૂરા ઉત્સાહ સાથે મનાવવામાં આવશે