લાતુર, તા.20: મહારાષ્ટ્રના લાતુર જિલ્લામાંથી એક અત્યંત હૃદયદ્રાવક અને ચિંતાજનક ઘટના સામે આવી છે. લાતુરના બોરગાંવ ગામના ૪૬ વર્ષીય ખેડૂત શંકર અબનરાવ ક્ષીરસાગરે પાક નિષ્ફળ જવાના કારણે સર્જાયેલી આર્થિક કટોકટી, ભારે દેવું અને દીકરીની મેડિકલ કોલેજની ફી માફ ન થવાના માનસિક તણાવથી પરેશાન થઈને પોતાના જ ખેતરમાં ફાંસો ખાઈને જીવન ટૂંકાવી લીધું છે. આ દુર્ઘટનાએ સમગ્ર વિસ્તારમાં અરેરાટી ફેલાવી દીધી છે.

પ્રાપ્ત વિગતો અનુસાર, શંકર ક્ષીરસાગરે પોતાની નાની જમીન પર સોયાબીનની ખેતી કરી હતી અને તેમને સારા પાકની અપેક્ષા હતી. પરંતુ, લાંબા સમય સુધી વરસાદ ન પડવાને કારણે તેમનો સમગ્ર પાક બરબાદ થઈ ગયો હતો. ખેતીમાંથી આવક બંધ થઈ જવાની સાથે અગાઉ લીધેલા દેવાની ચુકવણીનું ભારણ તેમના પર વધી ગયું હતું, જેના કારણે તેઓ આર્થિક રીતે સંપૂર્ણપણે ભાંગી પડ્યા હતા.

આ મુશ્કેલ પરિસ્થિતિ વચ્ચે તેમની એક દીકરી મેડિકલનો અભ્યાસ કરી રહી છે. સરકાર દ્વારા દુષ્કાળગ્રસ્ત ખેડૂતોનાં સંતાનોની શિક્ષણ ફી માફ કરવાની જાહેરાત કરવામાં આવી હોવા છતાં, શંકર ક્ષીરસાગરે અરજી કરવા છતાં તેમની દીકરીની ફી માફ કરવામાં આવી ન હતી. આર્થિક સંકડામણ અને દીકરીના ભવિષ્યની ચિંતાએ તેમને માનસિક રીતે અતિશય હચમચાવી દીધા હતા.

સોમવારે બપોરે શંકર ક્ષીરસાગર પોતાના ખેતરમાં ગયા હતા અને ત્યાં તેમણે મોબાઈલ ફોનથી એક વીડિયો રેકોર્ડ કરીને સોશિયલ મીડિયા પર અપલોડ કર્યો હતો. આ વીડિયોમાં તેમણે જિલ્લા કલેક્ટરને સંબોધીને સવાલ કર્યો હતો કે તેમને કોઈ પણ દેવા માફી યોજનાનો લાભ કેમ મળ્યો નથી અને વારંવાર અરજી કરવા છતાં દીકરીની મેડિકલ ફી કેમ માફ કરવામાં આવી નથી.

વીડિયો વાયરલ થતાં જ પરિવારજનો અને પોલીસે તેમની શોધખોળ હાથ ધરી હતી, પરંતુ પોલીસ ઘટનાસ્થળે પહોંચી ત્યારે કમનસીબે ખેડૂત મૃત્યુ પામ્યા હતા. લિંબગાંવ પોલીસ સ્ટેશનના અધિકારીઓએ આ અંગે માહિતી આપતા જણાવ્યું હતું કે પાક નુકસાન અને આર્થિક મુશ્કેલીઓને કારણે આ પગલું ભરાયું છે. આ ઘટનાએ ફરી એકવાર સરકારી રાહત યોજનાઓના અમલીકરણ અને ખેડૂતોની દયનીય સ્થિતિ સામે ગંભીર સવાલો ખડા કર્યા છે.