ચેન્નઈ : આજના ડિજિટલ યુગમાં સોશિયલ મીડિયા અને ઇન્ટરનેટ પર ઉપલબ્ધ અધકચરી માહિતી ક્યારેક કેવી જીવલેણ સાબિત થઈ શકે છે, તેનો એક અત્યંત કાળજું કંપાવી દેનારો કિસ્સો તમિલનાડુમાંથી સામે આવ્યો છે. તિરુપુર જિલ્લાના એક ગામમાં ૩૨ વર્ષીય મહિલાએ હોસ્પિટલ જવાને બદલે ઘરે જ બીજા બાળકને જન્મ આપ્યો હતો, પરંતુ ડિલિવરી બાદ વધુ પડતો રક્તસ્ત્રાવ (બ્લીડિંગ) થવાને કારણે તેનું કરૂણ મોત નીપજ્યું છે. આ કેસની પ્રાથમિક તપાસમાં ચોંકાવનારો ખુલાસો થયો છે કે, આ પરિવારે કોઈ લાયકાત ધરાવતા ડૉક્ટરની સલાહ લેવાને બદલે માત્ર યુટ્યુબ (YouTube) ના વીડિયો જોઈને ઘરે જ "કુદરતી પ્રસૂતિ" (નેચરલ બર્થ) કરાવવાનો આંધળો પ્રયાસ કર્યો હતો.

સી-સેક્શન (ઓપરેશન) અને એલોપેથીનો ડર બન્યો કાળ

પોલીસના જણાવ્યા અનુસાર, શશિકલા નામની આ મહિલાની પ્રથમ ગર્ભાવસ્થા દરમિયાન સિઝેરિયન સેક્શન (સી-સેક્શન) એટલે કે ઓપરેશન દ્વારા ડિલિવરી થઈ હતી. આ પ્રથમ પ્રસૂતિ બાદથી જ શશિકલા અને તેના પરિવારને એલોપેથિક દવાઓ અને ડૉક્ટરી પ્રક્રિયાઓ પ્રત્યે ભારે અણગમો પેદા થયો હતો.

પરિવાર કોઈપણ ભોગે બીજી વખત ઓપરેશન કરાવવા માંગતો ન હતો. આથી, તેઓએ શૉર્ટકટ અપનાવ્યો અને ઇન્ટરનેટ પર ઉપલબ્ધ 'હોમ ડિલિવરી' ના વીડિયો જોઈને ઘરે જ બાળકને જન્મ આપવાનું જોખમી પગલું ભરી લીધું.

સરકારી હેલ્થ ટીમોની સલાહને પણ ફગાવી દીધી

પોલીસના એક ઉચ્ચ અધિકારીએ જણાવ્યું કે, "પરિવાર કોઈપણ સંજોગોમાં સંસ્થાકીય અથવા તબીબી દેખરેખ હેઠળ ડિલિવરી કરાવવા ઈચ્છતો ન હતો. આ જ કારણે તેઓએ સમયાંતરે તપાસ અને ગર્ભાવસ્થા દરમિયાન થતી નિયમિત મોનિટરિંગ માટે સરકારી આરોગ્યસંભાળ ટીમો (આશા વર્કર્સ અથવા નર્સ) નો સંપર્ક પણ સાધ્યો ન હતો અને તેમની સલાહને સતત અવગણી હતી."

નવજાત બાળક સ્વસ્થ, પણ માતાએ જીવ ગુમાવ્યો

ઘરે જ જન્મેલું નવજાત બાળક સંપૂર્ણપણે સ્વસ્થ અને સુરક્ષિત હોવાનું જાણવા મળ્યું છે. પરંતુ, શશિકલાએ બાળકને જન્મ આપ્યા બાદ તુરંત જ તેની પ્લેસેન્ટા (ગર્ભનાળ) ને લગતી ગંભીર તબીબી ગૂંચવણો ઊભી થઈ હતી. આ ગૂંચવણના કારણે તેણીને સખત અવિરત રક્તસ્ત્રાવ શરૂ થઈ ગયો હતો. જ્યારે પરિસ્થિતિ હાથ બહાર નીકળી ગઈ, ત્યારે ગભરાયેલા પરિવારે તાત્કાલિક તેણીને પેરુન્ડુરાઈ ખાતેની સરકારી ઈરોડ મેડિકલ કોલેજ હોસ્પિટલમાં દાખલ કરી અને ત્યારબાદ વધુ સારી સારવાર માટે ખાનગી હોસ્પિટલમાં ખસેડી, પરંતુ ત્યાં સુધીમાં ઘણું મોડું થઈ ચૂક્યું હતું અને લોહી વહી જવાને કારણે મહિલાએ દમ તોડી દીધો હતો.

પતિ સામે ગુનો દાખલ: આરોગ્ય વિભાગ પણ એક્શનમાં

જોકે શશિકલાના પરિવારે આ મામલે કોઈ સત્તાવાર ફરિયાદ નોંધાવી નથી, પરંતુ આ ગંભીર બેદરકારીને ધ્યાનમાં રાખીને પોલીસે શશિકલાના પતિ કોલન્થાઈસામી સામે હત્યા ન ગણાતી ગુનાહિત માનવવધનો ગુનો (Culpable homicide not amounting to murder) દાખલ કર્યો છે. આ સાથે જ 'રાષ્ટ્રીય તબીબી કમિશન કાયદા' ની કડક કલમો પણ ઉમેરવામાં આવી છે.

આ તરફ રાજ્યના આરોગ્ય વિભાગે પણ આ કમનસીબ ઘટનાની સમાંતર તપાસ શરૂ કરી છે. તપાસ ટીમ એ બાબતની ચકાસણી કરી રહી છે કે પરિવારે ફરજિયાત પ્રસૂતિ પૂર્વેની તપાસ (Antenatal Checkups) કેટલી વાર છોડી હતી અને ડિલિવરી દરમિયાન કોઈ અનધિકૃત અથવા નકલી ડૉક્ટરની મદદ લેવાઈ હતી કે કેમ. આ ઘટનાએ ફરી એકવાર સાબિત કર્યું છે કે તબીબી બાબતોમાં ઇન્ટરનેટ પર અખતરા કરવા જીવલેણ નીવડી શકે છે.