ઓમાહા (નેબ્રાસ્કા) | તા.૧૧: એક તરફ દુનિયા લક્ઝરી ક્રૂઝની મુસાફરીના સપના જોતી હોય છે, ત્યારે 'એમવી હોન્ડિયસ' નામનું ક્રૂઝ શિપ મુસાફરો માટે દુઃસ્વપ્ન સાબિત થયું છે. આ જહાજ પર ફેલાયેલા ઘાતક 'હંટાવાયરસ' (એન્ડીઝ વાયરસ) એ અમેરિકામાં પણ દસ્તક આપી દીધી છે. આરોગ્ય અને માનવ સેવા વિભાગ (HHS) દ્વારા કરવામાં આવેલી જાહેરાત મુજબ, આ ક્રૂઝમાંથી પરત ફરેલા એક અમેરિકન મુસાફરનો ટેસ્ટ પોઝિટિવ આવ્યો છે, જ્યારે બીજા એક મુસાફરમાં વાયરસના હળવા લક્ષણો દેખાતા તબીબી જગતમાં ચિંતાનું મોજું ફરી વળ્યું છે.
રવિવારે રાત્રે એક ખાસ રિપેટ્રિએશન ફ્લાઇટ દ્વારા ૧૭ અમેરિકન મુસાફરોને અમેરિકા પરત લાવવામાં આવ્યા હતા. આ મિશન એટલું જોખમી હતું કે બે મુસાફરોને ખાસ 'બાયોકન્ટેનમેન્ટ યુનિટ'માં રાખીને મુસાફરી કરાવવામાં આવી હતી. સોમવારે વહેલી સવારે ૨:૩૦ વાગ્યે આ ફ્લાઇટ નેબ્રાસ્કાના રનવે પર ઉતરી ત્યારે એરપોર્ટ પર પીળા રંગના હેઝમેટ સૂટ પહેરેલી ટીમો તૈનાત હતી.

શું છે આ એન્ડીઝ વાયરસ? ૩૮ ટકા મૃત્યુદરથી ફફડાટ
એન્ડીઝ વાયરસ એ હંટાવાયરસનો જ એક પ્રકાર છે જે મુખ્યત્વે ઉંદર દ્વારા ફેલાય છે. આ વાયરસ કેટલો ખતરનાક છે તેનો અંદાજ એ વાત પરથી લગાવી શકાય કે સીડીસી (CDC) ના રિપોર્ટ મુજબ, જે દર્દીઓમાં શ્વસન સંબંધી લક્ષણો દેખાય છે તેમાંથી ૩૮ ટકા લોકોના મોત નીપજે છે. આ જહાજ પર અત્યાર સુધીમાં ત્રણ મુસાફરો આ વાયરસને કારણે જીવ ગુમાવી ચૂક્યા છે.
પોઝિટિવ આવેલા મુસાફરનો ટેસ્ટ 'હળવો પીસીઆર પોઝિટિવ' આવ્યો છે, પરંતુ વાયરસની ગંભીરતા જોતા તેને અત્યંત આધુનિક દેખરેખ હેઠળ રાખવામાં આવ્યો છે. બીજા લક્ષણો ધરાવતા મુસાફરને પણ અલગ ટ્રીટમેન્ટ સેન્ટરમાં ખસેડવાની તૈયારીઓ ચાલી રહી છે.

૪૨ દિવસનો કપરો આઇસોલેશન સમયગાળો
વિશ્વ આરોગ્ય સંગઠન (WHO) એ આ જહાજમાં મુસાફરી કરનારા તમામ લોકો માટે ૪૨ દિવસના લાંબા આઇસોલેશનની ભલામણ કરી છે. હાલ તમામ ૧૭ અમેરિકન મુસાફરોને નેબ્રાસ્કા મેડિકલ સેન્ટરના નેશનલ ક્વોરેન્ટાઇન યુનિટમાં રાખવામાં આવ્યા છે. આ એ જ સુવિધા છે જ્યાં અગાઉ ઈબોલા જેવા ગંભીર રોગોના દર્દીઓની સારવાર કરવામાં આવી હતી.
અધિકારીઓના જણાવ્યા મુજબ, દરેક મુસાફરનું ઝીણવટભર્યું ક્લિનિકલ મૂલ્યાંકન કરવામાં આવશે. ક્રૂઝ પર વેકેશન ગાળવા ગયેલા આ મુસાફરો માટે હવે ઘર સુધીનો રસ્તો હોસ્પિટલના આઈસોલેશન વોર્ડમાંથી પસાર થઈ રહ્યો છે. આ ઘટનાએ ફરી એકવાર આંતરરાષ્ટ્રીય સ્તરે જહાજોમાં ફેલાતી બીમારીઓ સામે સુરક્ષાના પ્રશ્નો ઉભા કર્યા છે.