નવી દિલ્હી : દિલ્હી સરકારે રાષ્ટ્રીય રાજધાનીમાં કોકરોચ જનતા પાર્ટી (CJP) ની આગેવાની હેઠળ યોજાયેલા ‘ચલો સંસદ’ આંદોલન દરમિયાન વિરોધ પ્રદર્શન કરનારા નાગરિકો માટે એક અત્યંત રાહતજનક નિર્ણય લીધો છે. દિલ્હી સરકારના ગૃહ વિભાગે દિલ્હી પોલીસને સ્પષ્ટ નિર્દેશ જારી કર્યો છે કે આ આંદોલનમાં ભાગ લેનારા સામાન્ય અને લાયક પ્રદર્શનકારીઓ સામે હવે પછી કોઈ પ્રતિકૂળ કાનૂની કે ફોજદારી કાર્યવાહી હાથ ધરવામાં આવશે નહીં.
ગૃહ વિભાગના આદેશ અનુસાર, વિરોધ પ્રદર્શન દરમિયાન અટકાયત કરવામાં આવેલા કે ધરપકડ કરાયેલા નિર્દોષ લોકોના કેસોની સમીક્ષા કરીને તેમને તાત્કાલિક મુક્ત કરવાની પ્રક્રિયા ઝડપી બનાવવામાં આવશે. સરકારે સ્પષ્ટ કર્યું છે કે વહીવટીતંત્ર સામાન્ય આંદોલનકારીઓ સામેના કેસો બંધ કરીને આ સમગ્ર વિવાદ પર આખરી પડદો પાડવા માંગે છે. આ નિર્ણયથી સંસદ કૂચ દરમિયાન પોલીસ કાર્યવાહીનો સામનો કરી રહેલા સેંકડો યુવાનો અને નાગરિકોને મોટી રાહત મળી છે.
જોકે, સરકારે આ રાહતની સાથે એક મોટો અપવાદ પણ રાખ્યો છે. આદેશમાં સ્પષ્ટપણે ટાંકવામાં આવ્યું છે કે જે લોકોનો અગાઉનો કોઈ ગુનાહિત પૃષ્ઠભૂમિ (Criminal background) નો રેકોર્ડ છે અથવા જેઓ હિંસા આચરવામાં સીધા સામેલ હતા, તેમને આ રાહત મળશે નહીં. સુપ્રીમ કોર્ટના નિર્દેશો મુજબ ગુનાહિત ભૂતકાળ ધરાવતા તત્વો સામે કાનૂની કાર્યવાહી અને તપાસ રાબેતા મુજબ ચાલુ જ રહેશે. ઉલ્લેખનીય છે કે 20 જુલાઈના રોજ યોજાયેલા વિરોધ પ્રદર્શન દરમિયાન થયેલી અસંતોષકારક ઘટનાઓ સંદર્ભે પોલીસે 13 FIR નોંધી હતી.