નવી દિલ્હી : દિલ્હીની નવી રેખા ગુપ્તા સરકારે મહિલા સશક્તિકરણની દિશામાં મોટું પગલું ભરતા 'દિલ્હી લક્ષ્મી યોજના' (DLY) નો પ્રારંભ કર્યો છે. ૨૦૨૫ ની ચૂંટણી દરમિયાન આપવામાં આવેલા વચનને પૂર્ણ કરતા સરકારે આ યોજના હેઠળ પાત્રતા ધરાવતી મહિલાઓના બેંક ખાતામાં દર મહિને ₹૨,૫૦૦ ની આર્થિક સહાય પહોંચાડવાની જાહેરાત કરી છે. કેટલાક કડક માપદંડોને કારણે આ યોજના ચર્ચામાં આવી હોવા છતાં, સરકારી વિગતો મુજબ અત્યાર સુધીમાં ૭ લાખથી વધુ મહિલાઓએ આ લાભ મેળવવા માટે નોંધણી કરાવી લીધી છે.

આ યોજનાનો લાભ મેળવવા માટે અરજદાર પરિવારની સૌથી મોટી મહિલા સભ્ય (ઉંમર ૨૧ થી ૬૦ વર્ષ) હોવી અનિવાર્ય છે. પરિવારની વાર્ષિક આવક ₹૨.૫ લાખથી વધુ ન હોવી જોઈએ અને તેઓ છેલ્લા ૧૦ વર્ષથી દિલ્હીના નિવાસી હોવા જોઈએ. આ ઉપરાંત, અરજદાર કે તેના પરિવારમાં કોઈ સરકારી કર્મચારી, ટેક્સપેયર, ચાર પૈડાંવાળા વાહનના માલિક કે પેન્શનધારક ન હોવા જોઈએ. સાથે જ, પરિવારમાં ૩ થી વધુ બાળકો ન હોવા અને વાર્ષિક ૨,૪૦૦ યુનિટથી વધુ વીજ વપરાશ ન હોવો એ પણ મહત્વની શરતોમાં સામેલ છે.

અરજી કરવા માટે મહિલા પાસે આધાર કાર્ડ, દિલ્હીનું મતદાર આઈડી અને પોતાના વિસ્તારના સાંસદ કે ધારાસભ્યનો સમર્થન પત્ર હોવો ફરજિયાત છે. લાભાર્થીના ખાતામાં નાણાં સીધા ટ્રાન્સફર કરવા માટે બેંક ખાતું સેન્ટ્રલ બેંક ડિજિટલ કરન્સી (CBDC) સિસ્ટમ સાથે જોડાયેલું હોવું જરૂરી છે. પાત્રતા ધરાવતી મહિલાઓ જરૂરી દસ્તાવેજો અપલોડ કરીને સત્તાવાર પોર્ટલ પર ઓનલાઈન અરજી સબમિટ કરી શકે છે.