નવી દિલ્હી: ઐતિહાસિક અને અત્યંત જાણીતા દિલ્હી જીમ ખાના ક્લબનો વિવાદ હવે દિલ્હી હાઇકોર્ટમાં પહોંચ્યો છે. કેન્દ્ર સરકારના શહેરી વિકાસ મંત્રાલયે સંરક્ષણ અને સુરક્ષાના કારણો આગળ ધરીને સફદરજંગ રોડ પર આવેલી ૨૭.૩ એકર જમીન તાત્કાલિક ખાલી કરવા માટે નોટિસ ફટકારી હતી. 

સરકારના આ આદેશ સામે ક્લબના સભ્યોએ ભારે વિરોધ નોંધાવ્યો છે અને વડી અદાલતમાં તાત્કાલિક અરજી દાખલ કરી છે. ક્લબની રજૂઆત છે કે સરકાર કોઈપણ પ્રકારના વળતર કે કાયદાકીય પ્રક્રિયા વિના જબરદસ્તીથી આ ઐતિહાસિક જગ્યા પર કબ્જો જમાવવા માંગે છે. 

સિનિયર વકીલ અભિષેક મનુ સિંઘવીએ અદાલતને મામલાની ગંભીરતા સમજાવતા કોર્ટે આજે આ કેસની તાત્કાલિક ધોરણે સુનાવણી હાથ ધરી છે, જેના પર હવે સૌની નજર મંડાયેલી છે.