નવી દિલ્હી : દિલ્હી હાઈકોર્ટે શુક્રવારે આપેલા એક મહત્વપૂર્ણ ચુકાદામાં ઓલ ઈન્ડિયા સ્ટુડન્ટ્સ એસોસિએશન (AISA) ના પ્રમુખ નેહા બોરાને મોટો ઝટકો આપ્યો છે. કોર્ટે નેહા બોરાની તે અરજીને ફગાવી દીધી છે, જેમાં તેમણે સ્પેશિયલ એક્ઝિક્યુટિવ મેજિસ્ટ્રેટ (SEM) કોર્ટ દ્વારા જારી કરાયેલી નોટિસને પડકારી હતી. આ નોટિસ હેઠળ તેમને તપાસ દરમિયાન શાંતિ જાળવી રાખવા માટે ૧૦,૦૦૦ રૂપિયાના બોન્ડ સાથે જામીન પર રહેવા માટે જણાવવામાં આવ્યું હતું. જોકે, હાઈકોર્ટે મેજિસ્ટ્રેટને સ્પષ્ટ નિર્દેશ આપ્યો છે કે તેઓ નેહા બોરાને આ કેસ સાથે જોડાયેલી તમામ સંબંધિત સામગ્રી સમયસર પૂરી પાડે.

ઘટનાની વિગતો મુજબ, ગત ૧૬ ઓક્ટોબરના રોજ દિલ્હીના મંડી હાઉસ ખાતે યોજાયેલા એક વિરોધ પ્રદર્શન દરમિયાન નેહા બોરાની અટકાયત કરવામાં આવી હતી. કનોટ પ્લેસના સેન્ટ્રલ પાર્કમાં રાષ્ટ્રધ્વજ ફરકાવવા માટે જઈ રહેલાં બોરાને પોલીસે અટકાયતમાં લીધા બાદ રાતોરાત કસ્ટડીમાં રાખ્યા હતા અને ૧૭ ઓક્ટોબરે મુક્ત કર્યા હતા. આ કાર્યવાહી સામે બોરાએ ભારતીય નાગરિક સુરક્ષા સંહિતા (BNSS) ની કલમ ૧૨૬ અને ૧૩૦ હેઠળ જારી કરાયેલી નિવારક નોટિસને હાઈકોર્ટમાં પડકારી હતી અને તેને રદ કરવાની માંગ કરી હતી. તેમના વકીલ દ્વારા એવી દલીલ કરવામાં આવી હતી કે વિરોધ શાંતિપૂર્ણ હતો અને નોટિસ યાંત્રિક રીતે જારી કરવામાં આવી છે.

બીજી તરફ, સરકાર તરફથી હાજર રહેલા એડિશનલ સોલિસિટર જનરલ ચેતન શર્માએ આ અરજીનો સખત વિરોધ કરતા જણાવ્યું હતું કે કલમ ૧૨૬ મેજિસ્ટ્રેટને મળેલી માહિતીના આધારે વ્યક્તિલક્ષી સંતોષ મેળવીને કાર્યવાહી કરવાની સત્તા આપે છે. કેસની સુનાવણી દરમિયાન જસ્ટિસ સુબ્રમણ્યમ પ્રસાદની બેન્ચે અવલોકન કર્યું હતું કે કેસમાં પૂરતા રક્ષણાત્મક પગલાં અમલમાં છે અને મેજિસ્ટ્રેટ તપાસ દરમિયાન બોરાને તમામ જરૂરી દસ્તાવેજો ઉપલબ્ધ કરાવશે. કોર્ટના આ આદેશથી સ્પષ્ટ થઈ ગયું છે કે હાલ તો AISA પ્રમુખે કાનૂની પ્રક્રિયાનું પાલન કરવું જ પડશે.