નવી દિલ્હી : ઉત્તર દિલ્હીના સરાઈ રોહિલ્લા વિસ્તારમાં ધોળા દિવસે બંદૂકની અણીએ થયેલી રૂ. ૧.૫ કરોડની સનસનાટીભરી લૂંટનો કેસ ઉકેલવામાં દિલ્હી પોલીસના સ્પેશિયલ સ્ટાફ અને ક્રાઈમ બ્રાન્ચની સંયુક્ત ટીમોને મોટી સફળતા મળી છે. પોલીસે ફિલ્મી સ્ટાઇલમાં આઠ રાજ્યોમાં લગભગ ૪,૦૦૦ કિલોમીટર સુધી ગુનેગારોનો પીછો કર્યો અને ૫૦૦ થી વધુ સીસીટીવી કેમેરાના ફૂટેજ ફંગોળ્યા બાદ આ ગેંગના ૮ સભ્યોની ધરપકડ કરી લીધી છે. પકડાયેલા આરોપીઓ પાસેથી રૂ. ૧.૧૫ કરોડની રોકડ, ગુનામાં વપરાયેલી બાઇક, સ્કૂટર અને લૂંટના પૈસાથી ખરીદેલા મોંઘા મોબાઈલ ફોન પણ જપ્ત કરવામાં આવ્યા છે.

ઘરના ભેદીએ જ લંકા ઢાડી: કંપનીનો કર્મચારી જ નીકળ્યો માસ્ટરમાઇન્ડ

પોલીસ તપાસમાં જે ખુલાસો થયો છે તે ચોંકાવનારો છે. આ સમગ્ર લૂંટનો માસ્ટરમાઇન્ડ બીજું કોઈ નહીં પણ પીડિત વેપારીની કંપનીનો જ વફાદાર કર્મચારી કરણ હતો. કરણે વધુ પૈસા કમાવવાની લાલચમાં આવીને રીઢા ગુનેગારો સાથે મળીને આ કાવતરું ઘડ્યું હતું. કરણ પાસે કંપનીની રોકડ રકમ અને તેના ટ્રાન્સપોર્ટેશનના લોકેશનની સંપૂર્ણ માહિતી હતી. ઘટનાના દિવસે ૧૦ જૂનના રોજ જ્યારે નીતિન નામનો અન્ય એક કર્મચારી કરણની સાથે સ્કૂટર પર બે બેગમાં આશરે ₹૧.૫ કરોડ લઈને નીકળ્યો, ત્યારે કરણ સતત લૂંટારૂઓને પોતાનું ‘લાઇવ લોકેશન’ મોકલી રહ્યો હતો.

જ્યારે તેઓ ઝાખીરા ફ્લાયઓવર પર પહોંચ્યા, ત્યારે હેલ્મેટ અને મફલરથી ચહેરો છુપાવીને આવેલા બાઇક સવારોએ પિસ્તોલ બતાવીને ૧.૫ કરોડ રૂપિયા લૂંટી લીધા હતા.

CCTV ફૂટેજ અને સગીરોના સ્કૂટરે ખોલ્યો ભેદ

ડીસીપી રાજા બંઠિયા અને ડીસીપી (ક્રાઈમ) હર્ષ ઈન્દોરાની આગેવાની હેઠળ પોલીસે તપાસ શરૂ કરી ત્યારે સીસીટીવીમાં એક શંકાસ્પદ સ્કૂટરનો નંબર ટ્રેસ થયો હતો, જે એક સગીરના નામે હતો. પોલીસે ૧૯ જૂનના રોજ બે સગીરોને પકડી પાડ્યા, જેમણે ગુના માટે વાહનો પૂરા પાડ્યા હતા. તેમની પૂછપરછના આધારે પોલીસે ગીતા કોલોની ફ્લાયઓવર પરથી વીરેશ ઉર્ફે વીરુની ધરપકડ કરી. વીરેશની કડક પૂછપરછ બાદ આખી કડી જોડાતી ગઈ અને પોલીસે કાવતરાખોર કર્મચારી કરણ, મનપ્રીત અને તેના પિતા ચરણજીત સિંહની પણ ધરપકડ કરી લીધી, જેમના પાસેથી ₹૪૯.૫૦ લાખ રિકવર થયા.

૬ રાજ્યો વટાવીને જમ્મુ સુધી ભાગ્યા મુખ્ય આરોપીઓ

લૂંટના બે મુખ્ય શાર્પશૂટર્સ વિક્કી ઉર્ફે ગાંજા (જેની સામે અગાઉ ૯ ગુના નોંધાયેલા છે) અને ધીર સિંહ (૧૮ ગુનાહિત કેસ) લૂંટ ચલાવ્યા બાદ મારુતિ સ્વિફ્ટ કાર લઈને દિલ્હીથી ભાગી ગયા હતા. પોલીસની ધરપકડથી બચવા માટે તેઓ સતત લોકેશન બદલતા રહ્યા અને રાજસ્થાન, ઉત્તર પ્રદેશ, મધ્ય પ્રદેશ, ઉત્તરાખંડ, હરિયાણા અને પંજાબ થઈને છેક જમ્મુ સુધી પહોંચી ગયા હતા. દિલ્હી પોલીસની ટીમ જ્યારે જમ્મુ પહોંચી, ત્યારે શાતિર બદમાશો ત્યાંથી નાસીને ફરી દિલ્હી આવી ચૂક્યા હતા. અંતે ૨૨ જૂનના રોજ દિલ્હીમાં જ ઘેરાબંધી કરીને આ બંનેને દબોચી લેવાયા હતા અને તેમની પાસેથી વધુ ₹૫૨ લાખ જપ્ત કરાયા હતા.

સેન્ટ્રલ રેન્જના સંયુક્ત કમિશનર મધુરા વર્માએ જણાવ્યું હતું કે, "અમારો સંદેશ બહુ સ્પષ્ટ છે કે ગુનેગારો ગમે ત્યાં જઈને છુપાય, તેઓ કાયદાના સિકંજામાંથી બચી શકતા નથી." પોલીસે હવે આ રીઢા ગુનેગારો સામે કડક મહારાષ્ટ્ર કંટ્રોલ ઓફ ઓર્ગેનાઈઝ્ડ ક્રાઈમ એક્ટ (MCOCA) લાગુ કરવાની પ્રક્રિયા શરૂ કરી દીધી છે.