નવી દિલ્હી, તા. ૧૪: વર્ષ ૨૦૨૦માં ઉત્તર-પૂર્વ દિલ્હીમાં ફાટી નીકળેલા ભયાનક રમખાણો દરમિયાન ઈન્ટેલિજન્સ બ્યુરો (IB) ના યુવા અધિકારી અંકિત શર્માની ઘાતકી હત્યાના કેસમાં કોર્ટના ઐતિહાસિક ચુકાદા બાદ દેશનું રાજકારણ ગરમાયું છે. દિલ્હીની અદાલતે આમ આદમી પાર્ટી (AAP) ના પૂર્વ કાઉન્સિલર તાહિર હુસૈન સહિત અન્ય ચાર આરોપીઓને દોષિત ઠેરવતા જ ભારતીય જનતા પાર્ટીએ વિપક્ષી ગઠબંધન પર ચોતરફી હુમલા શરૂ કરી દીધા છે. ભાજપે સીધો આરોપ લગાવ્યો છે કે AAP અને કોંગ્રેસે દેશવિરોધી તત્વો અને શહીદ અંકિત શર્માના હત્યારાઓને ખુલ્લેઆમ ટેકો આપ્યો હતો.
ગૌરવ ભાટિયાનો કેજરીવાલ પર સણસણતો પ્રહાર
રાજધાની નવી દિલ્હીમાં એક તાકીદની પત્રકાર પરિષદને સંબોધતા ભાજપના રાષ્ટ્રીય પ્રવક્તા ગૌરવ ભાટિયાએ અદાલતના ચુકાદાને આવકાર્યો હતો અને ન્યાયતંત્રની પ્રશંસા કરી હતી. જોકે, આ સાથે જ તેમણે આમ આદમી પાર્ટીના રાષ્ટ્રીય સંયોજક અરવિંદ કેજરીવાલને આડે હાથ લીધા હતા. ભાટિયાએ સનસનીખેજ આરોપ લગાવતા કહ્યું કે, "અરવિંદ કેજરીવાલે મુખ્યમંત્રી પદ પર રહેવા છતાં માત્ર અને માત્ર પોતાની વોટ-બેંકની ગંદી રાજનીતિ ચમકાવવા માટે મુખ્ય સૂત્રધાર તાહિર હુસૈનનો બચાવ કર્યો હતો. દિલ્હીના એ ભયાનક રમખાણો કેજરીવાલ સરકાર દ્વારા પ્રાયોજિત અને ઉશ્કેરવામાં આવ્યા હતા."
સોનિયા ગાંધી અને વિપક્ષ પર નિમ્ન સ્તરની રાજનીતિનો આરોપ
ભાજપના પ્રવક્તાએ માત્ર આમ આદમી પાર્ટી જ નહીં, પરંતુ કોંગ્રેસના વરિષ્ઠ નેતા સોનિયા ગાંધી પર પણ પ્રહારો કર્યા હતા. તેમણે જણાવ્યું કે દેશની સુરક્ષા એજન્સીના અધિકારીની હત્યા કરનારા કટ્ટરપંથીઓને પક્ષમાં રાખીને અને તેમને રાજકીય રક્ષણ આપીને સોનિયા ગાંધી અને કેજરીવાલે દેશની જનતા સાથે દ્રોહ કર્યો છે અને અત્યંત નિમ્ન સ્તરની રાજનીતિનું પ્રદર્શન કર્યું છે.
કોર્ટના આ ચુકાદા બાદ દિલ્હીના રાજકીય ગલિયારાઓમાં ભારે હલચલ મચી ગઈ છે. ભાજપ હવે આ મુદ્દાને લઈને જનતાની વચ્ચે જવાની તૈયારી કરી રહ્યું છે, જ્યારે બીજી તરફ આ ગંભીર આરોપો બાદ AAP અને કોંગ્રેસ બેકફૂટ પર આવી ગયા હોય તેમ જણાય છે.