નવી દિલ્હી, તા. 17: લોકસભામાં મહિલા અનામત અને સીમાંકન બિલ પર ચાલી રહેલી ચર્ચામાં કોંગ્રેસના વરિષ્ઠ નેતા શશી થરૂરે સરકાર પર આકરા પ્રહારો કર્યા છે. પોતાની આગવી શૈલીમાં દલીલો રજૂ કરતા થરૂરે ચેતવણી આપી હતી કે, જો સરકાર સીમાંકન (Delimitation) ની પ્રક્રિયાને મહિલા અનામત સાથે જોડશે, તો તે દેશ માટે એક ‘રાજકીય નોટબંધી’ જેવી સાબિત થશે, જે 2016ના આર્થિક વિક્ષેપ જેવી જ અરાજકતા પેદા કરી શકે છે.
મહિલા અનામતને 'બંધક' બનાવવાનો આક્ષેપ
થરૂરે દલીલ કરી હતી કે દેશમાં મહિલાઓને અનામત આપવા બાબતે તમામ પક્ષો વચ્ચે લગભગ સર્વસંમતિ છે. આમ છતાં, સરકારે તેને સીમાંકન અને વસ્તી ગણતરીની જટિલ શરતો સાથે જોડીને તેના અમલીકરણમાં ખોટો વિલંબ કર્યો છે. તેમણે કહ્યું, "સરકાર ભારતીય મહિલાઓની આકાંક્ષાઓને વહીવટી પ્રક્રિયાઓના નામે બંધક બનાવી રહી છે. જે કામ અત્યારે જ થઈ શકે તેમ છે, તેને ભવિષ્યના અચોક્કસ સીમાંકન સાથે કેમ સાંકળવામાં આવ્યું છે?"
સત્તાના સંતુલન પર ખતરો
સીમાંકનની પ્રક્રિયાને માત્ર તકનીકી કવાયત માનવાનો થરૂરે ઇનકાર કર્યો હતો. તેમણે જણાવ્યું કે આ એક મોટું રાજકીય પરિવર્તન છે જે વિવિધ રાજ્યો વચ્ચેના સત્તા સંતુલનને ખોરવી શકે છે. તેમના મતે, વસ્તીના આધારે બેઠકોની ફેરબદલ કરવાથી ભારતના સંઘીય માળખા (Federal Structure) પર બિનજરૂરી દબાણ આવશે, જે દેશની એકતા માટે જોખમી બની શકે છે.
નોટબંધી સાથે સીધી સરખામણી
સરકારના અભિગમ પર પ્રહાર કરતા થરૂરે કહ્યું કે, જેમ 2016માં કોઈ પણ તૈયારી વિના નોટબંધી લાગુ કરીને દેશને મુશ્કેલીમાં મુકાયો હતો, તેવી જ રીતે સરકાર સીમાંકન મામલે ઉતાવળ કરી રહી છે. તેમણે ભારપૂર્વક કહ્યું, "સીમાંકન એ રાજકીય નોટબંધી બની જશે. મહેરબાની કરીને આવું ન કરો."
નોંધનીય છે કે સરકાર અત્યારે લોકસભામાં બંધારણ (131મો સુધારો) બિલ અને કેન્દ્રશાસિત પ્રદેશો માટેના ક્વોટા બિલ પર ચર્ચા કરી રહી છે, જેનો વિપક્ષી નેતાઓ સીમાંકનની કવાયતને લઈને ઉગ્ર વિરોધ કરી રહ્યા છે. શશી થરૂરની આ 'નોટબંધી' વાળી સરખામણીએ સંસદમાં નવી ચર્ચા જગાવી છે.