નવી દિલ્હી : મહારાષ્ટ્રના રાજકારણમાં શિવસેના (ઉદ્ધવ ઠાકરે જૂથ) માં ચાલી રહેલી આંતરિક ડ્રામા હવે ચરમસીમા પર છે. શિવસેનાના નેતા સંજય રાઉતે દેશની સર્વોચ્ચ અદાલત (સુપ્રીમ કોર્ટ) અને ચૂંટણી પંચ સામે ગંભીર સવાલો ઉઠાવતા કહ્યું છે કે, "દેશમાં લોકશાહીના ટુકડા થઈ રહ્યા છે અને આ માટે સુપ્રીમ કોર્ટ અને ચૂંટણી પંચ બંને મુખ્યત્વે દોષિત છે." રાઉતનું આ આક્રમક નિવેદન પક્ષના બળવાખોર સાંસદોના મુદ્દા પર આવ્યું છે, જેણે સમગ્ર દેશના રાજકીય ગરમાવો વધારી દીધો છે.

બેઠકમાં માત્ર ૩ સાંસદો હાજર, ૬ સાંસદો 'ગાયબ'

ઘટનાક્રમ મુજબ, શિવસેના (UBT) એ તેના તમામ નવ સાંસદોને તાત્કાલિક દિલ્હી સ્થિત સંસદ કાર્યાલય ખાતે એક ખાસ બેઠક માટે બોલાવ્યા હતા. જોકે, આ બેઠક ત્યારે નિષ્ફળ સાબિત થઈ જ્યારે પક્ષના ૯ પૈકી માત્ર ૩ સાંસદો—અરવિંદ સાવંત, અનિલ દેસાઈ અને રાજાભાઉ વાઝે—હાજર રહ્યા હતા. સંજય રાઉત પોતે પણ ઉપસ્થિત હતા, પરંતુ અન્ય ૬ સાંસદો—નાગેશ અષ્ટિકર, સંજય દેશમુખ, સંજય જાધવ, સંજય દિના પાટિલ, ઓમપ્રકાશ રાજેનિમ્બાલકર અને ભાઉસાહેબ વાકચૌરે—બેઠકમાંથી ગેરહાજર રહ્યા હતા. સૂત્રોના જણાવ્યા અનુસાર, આ બળવાખોર સાંસદોએ એકનાથ શિંદે જૂથની શિવસેનામાં વિલીનીકરણની માંગણી કરતો પત્ર લોકસભા સ્પીકર ઓમ બિરલાને સુપરત કરી દીધો છે.

"દેશદ્રોહીઓને પાઠ ભણાવવામાં આવશે"

બળવાખોર સાંસદો પર વરસતા સંજય રાઉતે ચેતવણી આપતા કહ્યું કે, "આ વખતે રસ્તો સરળ રહેશે નહીં. પાર્ટીએ જ તેમને સાંસદ બનાવ્યા છે અને હવે કાર્યકરો રસ્તા પર ઉતરી આવ્યા છે. આ નેતાઓ હવે પોતાના ઘરો કે મતવિસ્તારોમાં પાછા ફરી શકશે નહીં. તેમને ત્યાં પહોંચવા માટે સેનાની મદદ લેવી પડશે." પક્ષ દ્વારા હવે આ ૬ સાંસદોને કારણદર્શક નોટિસ (Show Cause Notice) આપવામાં આવશે અને જો ૭ દિવસમાં સંતોષકારક જવાબ નહીં મળે, તો લોકસભા સ્પીકરને પત્ર લખી તેમની સદસ્યતા રદ કરવાની માંગ કરવામાં આવશે.

"પક્ષપલટા વિરોધી કાયદા હેઠળ, વ્હીપ માત્ર ગૃહની કાર્યવાહી માટે જારી કરી શકાય, આંતરિક પક્ષની બેઠકો માટે નહીં. તેથી પક્ષનો વ્હીપ અહીં લાગુ પડતો નથી."

— શિંદે જૂથના સૂત્રોનો દાવો

કાયદાકીય જંગની તૈયારી

બીજી તરફ, શિંદે જૂથનું કહેવું છે કે બંધારણની દસમી અનુસૂચિ (Anti-Defection Law) હેઠળ આ પ્રકારનો વ્હીપ આંતરિક બેઠકો માટે માન્ય નથી. જ્યારે ઉદ્ધવ ઠાકરે જૂથના નેતાઓએ લોકસભા સ્પીકર ઓમ બિરલાને મળીને કોઈપણ પ્રકારના ગેરકાયદેસર વિલીનીકરણને રોકવા માટે વિનંતી કરી છે. દેસાઈએ સ્પષ્ટતા કરી હતી કે કાયદા મુજબ, કોઈ જૂથ સીધું બીજા પક્ષમાં ભળી શકતું નથી જ્યાં સુધી તેની પાસે પૂરતી બે તૃતીયાંશ બહુમતી ન હોય. હાલમાં, આ હસ્તાક્ષરોની ચકાસણી કરવામાં આવી રહી છે, જે આગામી દિવસોમાં મહારાષ્ટ્રના રાજકારણમાં એક નવો વળાંક લાવી શકે છે.