ડેનવર, તા.૦૯: અમેરિકાના ડેનવર ઇન્ટરનેશનલ એરપોર્ટ પર શુક્રવારે મોડી રાત્રે એક અત્યંત વિચિત્ર અને કંપારી છૂટી જાય તેવી દુર્ઘટના ઘટી હતી. ડેનવરથી લોસ એન્જલસ જવા માટે રનવે પર દોડી રહેલા ફ્રન્ટીયર એરલાઇન્સના વિમાન આડે અચાનક એક વ્યક્તિ આવી જતાં તેનું ઘટનાસ્થળે જ કમકમાટીભર્યું મોત નીપજ્યું હતું. આ અકસ્માત એટલો ભયાનક હતો કે ટક્કર બાદ વિમાનના એન્જિનમાં આગ લાગી ગઈ હતી અને કેબિન ધુમાડાથી ભરાઈ ગઈ હતી.

બે જ મિનિટ અને મોતનો ભેટો

એરપોર્ટ સત્તાવાળાઓના જણાવ્યા અનુસાર, એક અજાણ્યો શખ્સ (જે એરપોર્ટનો કર્મચારી નહોતો) રાત્રિના અંધકારમાં સુરક્ષા વાડ કૂદીને રનવે પર ઘૂસી ગયો હતો. રનવે પાર કર્યાની માત્ર બે જ મિનિટમાં, ફ્લાઇટ ૪૩૪૫ (એરબસ A321) જે ૧૪૬ માઇલ પ્રતિ કલાકની ઝડપે ઉડાન ભરવાની તૈયારીમાં હતું, તેની સાથે તે શખ્સ અથડાયો હતો. પાઇલટે તાત્કાલિક બ્રેક મારીને ટેકઓફ રદ કર્યું હતું, પરંતુ ત્યાં સુધીમાં મોડું થઈ ચૂક્યું હતું. એર ટ્રાફિક કંટ્રોલના ઓડિયોમાં પાઇલટનો ગભરાયેલો અવાજ સંભળાય છે: “અમે હમણાં જ કોઈને ટક્કર મારી છે.”

વિસ્ફોટ જેવો અવાજ અને મુસાફરોમાં ચીસાચીસ

વિમાનમાં સવાર ૨૨૪ મુસાફરો અને ૭ ક્રૂ સભ્યો માટે આ ક્ષણ કોઈ હોરર ફિલ્મથી ઓછી નહોતી. મુસાફર જોસ સર્વાન્ટેસે જણાવ્યું કે, “મેં જમણી પાંખમાં આગ લાગતી જોઈ, જાણે કોઈ બોમ્બ ફૂટ્યો હોય તેવો અવાજ આવ્યો. મને લાગ્યું કે હું બળીને મરી જઈશ.” એન્જિનમાં લાગેલી આગને કારણે કેબિનમાં ધુમાડો ફેલાતા મુસાફરોને ઇમરજન્સી સ્લાઇડ્સ દ્વારા વિમાનમાંથી બહાર કાઢવામાં આવ્યા હતા. આ પ્રક્રિયામાં ૧૨ લોકોને નાની-મોટી ઈજાઓ થઈ છે, જેમાંથી ૫ ને હોસ્પિટલ ખસેડાયા છે.

સુરક્ષા એજન્સીઓ દોડતી થઈ

આ ઘટના બાદ એફએએ (FAA) અને એનટીએસબી (NTSB) એ તપાસના આદેશ આપ્યા છે. ટ્રાન્સપોર્ટેશન સેક્રેટરી સીન ડફીએ આ ઘટના પર દુઃખ વ્યક્ત કરતા કહ્યું કે, તે વ્યક્તિ ઇરાદાપૂર્વક વાડ ઓળંગીને રનવે પર દોડ્યો હતો. એરપોર્ટની વાડ અકબંધ હોવા છતાં, તે વ્યક્તિ કેવી રીતે અંદર ઘૂસ્યો તે એક મોટો તપાસનો વિષય છે. રનવે ૧૭એલ (17L) ને હાલ તપાસ માટે બંધ કરી દેવામાં આવ્યો છે.

આ અકસ્માતે મુસાફરોમાં એટલી દહેશત ફેલાવી છે કે ઘણા લોકોએ તેમની આગળની મુસાફરી રદ કરી દીધી હતી. હાલમાં મૃતકની ઓળખ મેળવવા અને આત્મઘાતી કદમ પાછળનું કારણ જાણવા પોલીસ અને સુરક્ષા એજન્સીઓ ઊંડી તપાસ કરી રહી છે.