સિહાનૌકવિલે : ફ્લોરિડા સ્થિત કંપની દ્વારા સંચાલિત વિશ્વપ્રસિદ્ધ રહેણાંક ક્રૂઝ જહાજ 'વિલા વી ઓડિસી' બુધવારે વહેલી સવારે કંબોડિયાના સિહાનૌકવિલે બંદર ખાતેથી કોઈપણ મુસાફર વગર માત્ર ક્રૂ સભ્યો સાથે જ આગલા ગંતવ્ય સ્થાન તરફ રવાના થઈ ગયું હતું, જેને પગલે જહાજને પોતાનું કાયમી ઘર માનનાર મુસાફરો મુશ્કેલીમાં મુકાયા છે.

પ્રાપ્ત વિગતો અનુસાર, ઇંધણના ખર્ચમાં અસાધારણ વધારો થવાને કારણે કંપનીની કામગીરી અચાનક સ્થગિત કરવામાં આવી હતી અને જહાજ પર રહેતા ૨૦૩ જેટલા મુસાફરોને માત્ર સાત કલાકની ટૂંકી નોટિસ આપીને જહાજ ખાલી કરવાનો આદેશ આપવામાં આવતા અનેક નાગરિકો કંબોડિયામાં જ અટવાઈ ગયા હતા.

ઘટનાની વિગતવાર માહિતી આપતા ઓપરેટર દ્વારા જણાવવામાં આવ્યું હતું કે અગાઉ પ્રતિ કેબિન આશરે ૧,૮00 ડોલર જેટલો ઇંધણ ખર્ચ થતો હતો તે વધીને ૬,૦૦૦ થી ૮,૦૦૦ ડોલર સુધી પહોંચી ગયો હતો, જેના કારણે આટલો મોટો આર્થિક બોજ મુસાફરો કે કંપની પર ઝીંકવો અશક્ય બનતા આ કડક પગલું લેવું પડ્યું હતું.

આ જહાજ પર અનેક મુસાફરોએ પોતાની આખી જિંદગીની બચત અને ઘર-સંપત્તિ વેચીને મોટી રકમનું રોકાણ કર્યું હતું અને તેને એક કાયમી વસવાટનું સ્થળ બનાવ્યું હતું, પરંતુ અચાનક સેવાઓ બંધ થઈ જવાથી તેમના ભવિષ્ય સામે અનિશ્ચિતતા અને ચિંતાના વાદળો ઘેરાયા છે.

ભૂતકાળમાં ઓક્ટોબર ૨૦૨૪થી સતત સમુદ્રમાં વિભિન્ન દેશોની સફર ખેડતું આ તરતું રહેણાંક જહાજ આંતરરાષ્ટ્રીય સ્તરે ચર્ચાનું કેન્દ્ર બન્યું હતું, પરંતુ વૈશ્વિક સ્તરે બળતણ અને નાણાકીય કટોકટીના કારણે આ અદભુત પ્રવાસન મોડેલ પર ગંભીર પ્રશ્નાર્થ ચિન્હો ઊભા થયા છે.

આગામી સમયમાં ધિરાણકર્તાઓ દ્વારા આ જહાજનો કબજો લેવા બાબતે તથા રોકાણકારો અને મુસાફરોના નાણાકીય હિતોની રક્ષા માટે કયા કાયદાકીય અને વ્યવસ્થાપકીય પગલાં લેવામાં આવશે તેના પર સૌની નજર ટકેલી છે.