નવી મુંબઈ : મહારાષ્ટ્રના રાજકારણમાંથી અત્યારના સૌથી મોટા અને ચર્ચાસ્પદ સમાચાર સામે આવ્યા છે. મહારાષ્ટ્રના નાયબ મુખ્યપ્રધાન એકનાથ શિંદેએ નવી મુંબઈની વર્ષો જૂની અને અત્યંત જર્જરિત ઇમારતોના પુનઃવિકાસ માટે મહત્વપૂર્ણ ગણાતી 'ક્લસ્ટર સ્કીમ' (Cluster Scheme) લાગુ કરવાનો મોટો અને નિર્ણાયક આદેશ આપ્યો છે. આ યોજના હેઠળ જો એક કરતાં વધુ હાઉસિંગ સોસાયટીઓ એકસાથે મળીને પુનઃવિકાસ કરશે, તો તેમને વિશેષ ડિસ્કાઉન્ટ અને લાભો આપવામાં આવશે. આ પગલાથી ખતરનાક ઇમારતોમાં જીવના જોખમે રહેતા હજારો નાગરિકોને મોટી રાહત મળશે, પરંતુ આ નિર્ણયની પાછળ નવી મુંબઈના દિગ્ગજ નેતા અને પ્રધાન ગણેશ નાઈકને મોટો રાજકીય ઝટકો મળ્યો હોવાની ચર્ચાએ જોર પકડ્યું છે.

અગાઉ નવી મુંબઈ મહાનગરપાલિકામાં પ્રધાન ગણેશ નાઈકનું વર્ચસ્વ હોવાને કારણે પાલિકાએ આ ક્લસ્ટર યોજનાનો ઉગ્ર વિરોધ કર્યો હતો. પાલિકા દ્વારા તર્ક આપવામાં આવ્યો હતો કે આ યોજનાથી શહેરમાં વસ્તીનું ભારણ અતિશય વધી જશે અને પાણી તેમજ અન્ય મૂળભૂત સુવિધાઓ પર ગંભીર અસર પડશે, જેને લઈને પાલિકાએ આ યોજનાને અટકાવતો ઠરાવ પણ પસાર કર્યો હતો. જો કે, એકનાથ શિંદેના તાબા હેઠળના નગર વિકાસ વિભાગે પાલિકાના આ વિરોધને સદંતર ફગાવી દીધો છે અને સ્પષ્ટ કર્યું છે કે સામાન્ય નાગરિકોને સુરક્ષિત અને સારા મકાનો ઉપલબ્ધ કરાવવા સરકારની પ્રાથમિકતા છે.

એકનાથ શિંદે અને ગણેશ નાઈક વચ્ચે અગાઉથી જ કડવાશ જગજાહેર છે, ત્યારે આ યોજનાને મંજૂરી આપીને શિંદેએ સ્થાનિક સ્તરે નાઈકને રાજકીય માત આપી છે. હવે આ કડવા નિર્ણાયક પગલા બાદ ગણેશ નાઈક કયા પ્રકારનું વલણ અપનાવે છે અને આગામી દિવસોમાં રાજકીય સમીકરણો કેવા બદલાય છે, તેના પર સમગ્ર રાજ્યની નજર ટકેલી છે.