​નવી દિલ્હી : ભારતની વધતી જતી આકાંક્ષાઓ અને 'આત્મનિર્ભર ભારત'ના સંકલ્પને વધુ એક મોટી સફળતા મળી છે. નેશનલ એરોસ્પેસ લેબોરેટરીઝ (NAL) દ્વારા વિકસિત કરવામાં આવી રહેલા ૧૯-સીટર લાઈટ ટ્રાન્સપોર્ટ એરક્રાફ્ટ 'સારસ MK-II' ના ડિઝાઇન ફેઝનું કાર્ય સફળતાપૂર્વક પૂર્ણ કરી લેવામાં આવ્યું છે. આ ઐતિહાસિક સિદ્ધિ બદલ કેન્દ્રીય નાગરિક ઉડ્ડયન મંત્રી રામ મોહન નાયડુએ ખુશી વ્યક્ત કરતા NALની ટીમને અભિનંદન પાઠવ્યા છે.

​આ અંગે સોશિયલ મીડિયા પર પોતાની પ્રતિક્રિયા આપતા મંત્રી રામ મોહન નાયડુએ જણાવ્યું હતું કે, સારસ MK-II એ દેશનું પ્રથમ સંપૂર્ણપણે સ્વદેશી ડિઝાઇન ધરાવતું લાઈટ ટ્રાન્સપોર્ટ વિમાન છે, જે વડાપ્રધાન નરેન્દ્ર મોદીના 'આત્મનિર્ભર ભારત'ના વિઝનને સાકાર કરવાની દિશામાં એક મહત્વનું પગલું છે.

​દૂરના વિસ્તારો સુધી પહોંચશે હવે 'મેડ ઇન ઇન્ડિયા' વિમાનો

​મંત્રીએ વધુમાં ભાર મૂકતા જણાવ્યું હતું કે, સ્થાનિક એરોસ્પેસ મેન્યુફેક્ચરિંગમાં આવેલી આ સફળતા આપણા ઉડ્ડયન ક્ષેત્ર માટે ગેમ-ચેન્જર સાબિત થશે. ખાસ કરીને દેશની મહત્વાકાંક્ષી 'ઉડાન' (UDAN) યોજનાને આ પ્રોજેક્ટથી ખૂબ મોટો વેગ મળશે. સારસ MK-II વિમાનની વિશેષતા એ છે કે તે અત્યંત દુર્ગમ અને ઊંચાઈવાળા એરફિલ્ડ્સ સુધી પહોંચવા અને ત્યાંથી સંચાલન કરવા માટે સક્ષમ હશે. આ વિમાનના કારણે દેશના અંતરિયાળ વિસ્તારોને હવાઈ માર્ગે જોડવાનું લક્ષ્ય વધુ સરળ અને ઝડપી બનશે.

​આ પ્રોજેક્ટ માત્ર ટેકનોલોજીની દ્રષ્ટિએ જ નહીં, પરંતુ ભારતના એરોસ્પેસ ઉદ્યોગને આત્મનિર્ભર બનાવવાના માર્ગે એક સીમાચિહ્નરૂપ ઘટના છે. નિષ્ણાતો માને છે કે, સારસ MK-II નું ડિઝાઇનિંગ પૂર્ણ થવું એ એ વાતની સાબિતી છે કે ભારત હવે જટિલ એરક્રાફ્ટ એન્જિનિયરિંગમાં પણ વિશ્વસ્તરીય ક્ષમતા ધરાવે છે. આગામી સમયમાં આ વિમાન ભારતીય આકાશમાં ઉડાન ભરશે ત્યારે તે સ્થાનિક ઉડ્ડયન ક્ષેત્રમાં નવા યુગનો પ્રારંભ કરશે.