નવી દિલ્હી, તા.૦૬: દિવાળીના પાવન અવસરે મીઠાઈ વગર તહેવારની કલ્પના કરવી મુશ્કેલ છે, પરંતુ ડાયાબિટીસથી પીડિત લોકો માટે મીઠાઈ ખાવી એ સ્વાસ્થ્યની દ્રષ્ટિએ જોખમી સાબિત થઈ શકે છે, જેને ધ્યાનમાં રાખીને ડાયાબિટીસ નિષ્ણાતોએ તહેવારો દરમિયાન ખાંડના પ્રમાણ અને જોખમ અનુસાર મીઠાઈઓનું સચોટ વર્ગીકરણ કર્યું છે.

ડાયોબિટીસ નિષ્ણાત ડૉ. પ્રમોદ ત્રિપાઠીના જણાવ્યા અનુસાર, સ્વાસ્થ્ય પ્રત્યે જાગૃત રહીને જો યોગ્ય મીઠાઈની પસંદગી કરવામાં આવે તો બ્લડ સુગરના સ્તરમાં અચાનક વધારો અટકાવી શકાય છે, જેમાં ડ્રાયફ્રૂટ રોલ, ડ્રાયફ્રૂટ લાડુ અને ફિગ રોલને સૌથી ઓછા જોખમવાળા અને સલામત વિકલ્પો તરીકે ગણવામાં આવ્યા છે.

આ સલામત મીઠાઈઓનો ગ્લાયકેમિક ઇન્ડેક્સ ૪૦ થી ૪૫ ની આસપાસ હોય છે અને તેમાં બદામ તથા ભરપૂર ફાઇબર હોવાને કારણે ખાંડનું શરીર દ્વારા શોષણ ધીમું થાય છે, જેથી કાજુ કટલી, બદામ કટલી અને ચણાના લોટના લાડુ પણ મર્યાદિત માત્રામાં ખાવા માટે અનુકૂળ સાબિત થાય છે.

આ ઉપરાંત રવા લાડુ, ચુરમા લાડુ, નારિયેળ બરફી અને મૈસુર પાક જેવી મીઠાઈઓને મધ્યમ જોખમની શ્રેણીમાં રાખવામાં આવી છે, કારણ કે તેમાં રહેલું શુદ્ધ ઘી ખાંડના પાચન અને શોષણની પ્રક્રિયાને ધીમી પાડે છે, જેથી તેને મર્યાદિત માત્રામાં માણી શકાય છે.

બીજી તરફ જલેબી, ઇમરતી, સોનપાપડી, ગુલાબજામુન અને પરંપરાગત બંગાળી મીઠાઈઓ ડાયાબિટીસના દર્દીઓ માટે અત્યંત જોખમી સાબિત થઈ શકે છે, કારણ કે તેમાં ૮૦ ટકા સુધી ખાંડ અને ઊંચો ગ્લાયકેમિક ઇન્ડેક્સ હોવાથી તે સેવન કર્યાની સાથે જ બ્લડ સુગરને અત્યંત ઝડપથી વધારે છે.
 

તહેવારોના આ દિવસોમાં તબીબી સલાહને અનુસરીને મર્યાદિત અને સંયમિત આહાર અપનાવવાથી ડાયાબિટીસના દર્દીઓ પોતાના સ્વાસ્થ્યને જોખમમાં મૂક્યા વગર પરિવાર સાથે ઉત્સવનો આનંદ ઉઠાવી શકે છે.