કેશ્યારી:પશ્ચિમ બંગાળ વિધાનસભા ચૂંટણીનો જંગ હવે લોહિયાળ અને તેજાબી નિવેદનોથી આગળ વધીને શેરી યુદ્ધ સુધી પહોંચી ગયો હોય તેવું જણાય છે. ભાજપના આઈટી સેલના વડા અમિત માલવિયાએ સોશિયલ મીડિયા પર બે વિરોધાભાસી વીડિયો શેર કરીને મુખ્યમંત્રી મમતા બેનર્જીની ઊંઘ હરામ કરી દીધી છે. માલવિયાએ દાવો કર્યો છે કે મમતા બેનર્જીએ અગાઉ એક રેલીમાં તેમના વિરોધીઓને 'ઝાડુ' બતાવવાની જે હાકલ કરી હતી, તે હવે તેમના જ પક્ષ માટે શાપ બની ગઈ છે. વાયરલ વીડિયોમાં જોઈ શકાય છે કે રોષે ભરાયેલા ગ્રામજનો હાથમાં ઝાડુ લઈને તૃણમૂલ કોંગ્રેસના ઉમેદવારોને ગામમાંથી બહાર ભગાડી રહ્યા છે, જે બંગાળમાં બદલાતા રાજકીય પવનોનો સ્પષ્ટ સંકેત આપી રહ્યા છે.

રાજકીય નિષ્ણાતો આ ઘટનાને મમતા બેનર્જી માટે મોટી ફજેતી ગણાવી રહ્યા છે. એક તરફ મમતા બેનર્જી પશ્ચિમ મિદનાપુરના કેશ્યારીમાં ગર્જના કરી રહ્યા છે કે ભાજપ અને ચૂંટણી પંચે મળીને તેમની ઉમેદવારી રદ કરવાનું કાવતરું ઘડ્યું હતું, તો બીજી તરફ જમીની સ્તર પર સ્થિતિ કંઈક અલગ જ જોવા મળી રહી છે. મમતાએ આરોપ લગાવ્યો છે કે મતદાર યાદી સુધારણા દરમિયાન લાખો નામો જાણીજોઈને કાઢી નાખવામાં આવ્યા છે. જોકે, અમિત માલવિયાની આ પોસ્ટ બાદ ભાજપ આક્રમક મૂડમાં છે અને કહી રહ્યું છે કે જે લોકોએ પંદર વર્ષ સુધી જનતા પર અત્યાચાર કર્યો છે, તેમને હવે જનતા સબક શીખવી રહી છે.

બીજી તરફ, કેન્દ્રીય ગૃહમંત્રી અમિત શાહે પણ બાંકુરા અને પુરુલિયાની રેલીઓમાં મમતા બેનર્જીના 'વિક્ટિમ કાર્ડ' પર આકરા પ્રહારો કર્યા છે. શાહે સ્પષ્ટ શબ્દોમાં જણાવ્યું છે કે ટીએમસીના શાસનમાં બંગાળ માત્ર 'સિન્ડિકેટ રાજ' અને મહિલાઓ પરના અત્યાચારનું કેન્દ્ર બની ગયું છે. ભવાનીપુર બેઠક પર સુવેન્દુ અધિકારી સામેની લડાઈમાં ફસાયેલા મમતા બેનર્જી માટે હવે ઘરઆંગણે જ વિરોધનો સામનો કરવો મુશ્કેલ બની રહ્યો છે. જે રીતે ગામડાઓમાં ઝાડુ લઈને મહિલાઓ રસ્તા પર ઉતરી છે, તે જોતા આગામી દિવસોમાં મમતા બેનર્જી અને તેમની પાર્ટી માટે સત્તા બચાવવી એક મોટો પડકાર બની રહેશે.