રિયાધ, તા.૩૦: મધ્ય પૂર્વ (મિડલ ઈસ્ટ) માં ચાલી રહેલા પ્રાદેશિક તણાવ વચ્ચે ઈઝરાયલના વડાપ્રધાન બેન્જામિન નેતન્યાહૂની સંયુક્ત આરબ અમીરાત (UAE) ની તાજેતરની મુલાકાતને લઈને મોટો વિવાદ ઊભો થયો છે. નેતન્યાહૂ અને UAE ના રાષ્ટ્રપતિ શેખ મોહમ્મદ બિન ઝાયેદ અલ નાહ્યાન વચ્ચેની ગુપ્ત કે બહુપક્ષીય બેઠકમાં સાઉદી અરેબિયાના પ્રતિનિધિએ ભાગ લીધો હોવાના અહેવાલોને સાઉદી સરકારે સત્તાવાર રીતે ફગાવી દીધા છે.

ઈઝરાયલી આઉટલેટ Ynet નો દાવો અને પાછળથી પીછેહઠ

ઈઝરાયલી સમાચાર માધ્યમ 'Ynet' એ અહેવાલ આપ્યો હતો કે અબુ ધાબીમાં નેતન્યાહૂ અને શેખ મોહમ્મદ વચ્ચેની મુલાકાત બાદ એક મોટી વિસ્તૃત બેઠક યોજાઈ હતી. જેમાં સાઉદી અરેબિયા, જોર્ડન, મોરોક્કો, કતાર અને લિબિયાના વરિષ્ઠ અધિકારીઓએ ભાગ લીધો હતો. આ બેઠકમાં મુખ્યત્વે ઈરાન, હૂતી વિદ્રોહીઓ, સુરક્ષા સહયોગ અને પ્રાદેશિક એર ડિફેન્સ જેવા સંવેદનશીલ મુદ્દાઓ પર ચર્ચા થઈ હોવાનું કહેવાયું હતું.

જોકે, વિવાદ વકરતાં Ynet એ પોતાનો અહેવાલ પાછો ખેંચી લીધો હતો અને સ્વીકાર્યું હતું કે આવી કોઈ બેઠક યોજાઈ હોવાની તેઓ પુષ્ટિ કરી શકતા નથી. સાઉદી અરેબિયા અને જોર્ડન બંને દેશોના સત્તાવાર પ્રવક્તાઓએ આ અહેવાલોને સંપૂર્ણપણે પાયાવિહોણા ગણાવ્યા છે.

૬ કલાક ચાલેલી બેઠક અને ૭ ઓક્ટોબરના હુમલા અંગેનો વિવાદ

રોઇટર્સના અહેવાલ મુજબ, નેતન્યાહૂ અને શેખ મોહમ્મદ વચ્ચે અબુ ધાબીમાં યોજાયેલી દ્વિપક્ષીય બેઠક લગભગ ૬ કલાક સુધી ચાલી હતી, જેમાં પ્રાદેશિક સુરક્ષા અને ઈરાન પર મુખ્ય ધ્યાન કેન્દ્રિત કરવામાં આવ્યું હતું.

આ બેઠક પાછળ અન્ય એક મોટું કારણ ઈઝરાયલી અખબાર 'હારેટ્ઝ' નો અહેવાલ હતો. અહેવાલમાં દાવો કરાયો હતો કે ૭ ઓક્ટોબર ૨૦૨૩ ના રોજ હમાસે કરેલા હુમલા પહેલાં UAE ના રાષ્ટ્રપતિએ નેતન્યાહૂને અગાઉથી ચેતવણી આપી હતી. અહેવાલો અનુસાર, નેતન્યાહૂએ શેખ મોહમ્મદને આ દાવાનું જાહેરમાં ખંડન કરવા વિનંતી કરી હતી, કારણ કે નેતન્યાહૂ સતત આવી કોઈ ચેતવણી મળી હોવાનો ઇનકાર કરતા આવ્યા છે.

ઈરાનની સખત પ્રતિક્રિયા

બીજી તરફ, નેતન્યાહૂની આ UAE મુલાકાતથી ઈરાન ભારે નારાજ થયું છે. ઈરાનના વિદેશ મંત્રાલયે UAE ને કડક ચેતવણી આપતાં જણાવ્યું છે કે ઈઝરાયલના વડાપ્રધાનને યજમાની આપવાના "અત્યંત ખતરનાક પરિણામો" આવી શકે છે. ઈરાને પ્રદેશના અન્ય આરબ દેશોને પણ ઈઝરાયલની ચાલબાજીઓથી સાવધ રહેવા આહ્વાન કર્યું છે.