ઇસ્લામાબાદ, તા.૧૭: સાઉદી અરેબિયા, પાકિસ્તાન અને તુર્કી વચ્ચે તાજેતરમાં હસ્તાક્ષર કરાયેલા ‘મક્કા સંયુક્ત સંરક્ષણ કરાર’ (જેને ઇસ્લામિક નાટો તરીકે પણ ઓળખવામાં આવે છે) પર ગંભીર સંકટના વાદળો ઘેરાયા છે. યમનના ઈરાન સમર્થિત હુથી બળવાખોરો દ્વારા સાઉદી અરેબિયાના તેલ ક્ષેત્રો અને પવિત્ર શહેર મક્કા પર વધતા જતા ડ્રોન અને મિસાઈલ હુમલાઓ વચ્ચે પાકિસ્તાનની દ્વિવિધાપૂર્ણ ભૂમિકા સામે આવી છે. સાઉદી અરેબિયાને તાત્કાલિક લશ્કરી મદદ મોકલવાને બદલે પાકિસ્તાન હાલમાં કેવળ રાજદ્વારી દાવપેચ ચલાવી રહ્યું હોવાના અહેવાલોથી ભારે ચર્ચા જાગી છે.

આ સમગ્ર મામલે સ્પષ્ટતા કરતા પાકિસ્તાનના સંરક્ષણ પ્રધાન ખ્વાજા આસિફે જણાવ્યું હતું કે, કરારની શરતો ખૂબ જ સ્પષ્ટ છે. જો આ સંધિમાં સામેલ કોઈ એક દેશની પ્રાદેશિક અખંડિતતા કે સરહદો પર હુમલો થાય છે, તો તે ત્રણેય દેશો પરનો હુમલો ગણાશે અને અન્ય બે દેશો પર પરસ્પર સંરક્ષણની જવાબદારી લાગુ થશે. આસિફે સંકેત આપ્યો હતો કે સ્થિતિ હવે એવા વળાંક પર પહોંચી ગઈ છે જ્યાં આ કરારનો અમલ કરવો પડે તેમ છે. જો પરિસ્થિતિ વધુ વણસશે તો પાકિસ્તાન અને તુર્કી બંને સાઉદી અરેબિયા સાથે મૌખિક, રાજદ્વારી અને વ્યવહારિક રીતે અડીખમ ઊભા રહેશે.

જોકે, વાસ્તવિકતા એ છે કે પાકિસ્તાન માટે હુથીઓ સામે સીધી લશ્કરી સૈન્ય કાર્યવાહી કરવી અત્યંત જોખમી છે. કારણ કે હુથીઓને સમર્થન આપતા ઈરાન સાથે પાકિસ્તાન પોતાની દક્ષિણ-પશ્ચિમ સરહદ શેર કરે છે. હુથીઓ પર સીધો હુમલો કરવાથી ઈરાન સાથેનો તણાવ વધી શકે છે, જેથી પાકિસ્તાન ઈરાન પર દબાણ લાવીને હુથીઓને અટકાવવાનો પ્રયાસ કરી રહ્યું છે. ગયા મહિને જ ૭ ઓગસ્ટના રોજ સાઉદી ક્રાઉન પ્રિન્સ મોહમ્મદ બિન સલમાન, તુર્કીના રાષ્ટ્રપતિ એર્દોગન અને પાકિસ્તાનના વડા પ્રધાન શાહબાઝ શરીફ વચ્ચે આ ઐતિહાસિક સંરક્ષણ કરાર થયો હતો, પરંતુ પ્રથમ કસોટીમાં જ પાકિસ્તાનની ઢીલી નીતિથી સાઉદી કેમ્પમાં અસંતોષ જોવા મળી રહ્યો છે.