મુન્દ્રા : કચ્છના અદાણી મુન્દ્રા બંદરે સુરક્ષા અને ગુપ્તચર એજન્સીઓ દ્વારા હાથ ધરવામાં આવેલા એક મેગા ઓપરેશનમાં વિદેશી સિગારેટની ગેરકાયદે દાણચોરી કરતા આંતરરાષ્ટ્રીય રેકેટનો પર્દાફાશ થયો છે, જ્યાં અખાતી દેશોમાંથી આયાત કરાયેલાં ૧૮ શંકાસ્પદ કન્ટેનરોનું ક્લિયરન્સ અટકાવીને DRI દ્વારા હાથ ધરેલી તપાસમાં કરોડો રૂપિયાની કિંમતની પ્રતિબંધિત ઇમ્પોર્ટેડ સિગારેટનો મોટો જથ્થો ઝડપાઈ ગયો છે.

પ્રાપ્ત વિગતો અનુસાર, ડીઆરઆઈના અધિકારીઓને ચોક્કસ બાતમી મળી હતી કે કેટલાક આયાતકારો કસ્ટમ્સ વિભાગ સમક્ષ બિલ ઓફ એન્ટ્રીમાં અન્ય સામાન્ય માલસામાનની આયાત દર્શાવીને 'મિસ-ડિકલેરેશન' કરે છે અને તેની આડમાં વિદેશી સિગારેટ દેશમાં ઘુસાડી રહ્યા છે, જેને પગલે મુન્દ્રા પોર્ટ પર પહોંચેલાં ૧૮ શંકાસ્પદ કન્ટેનરોને અટકાવીને સર્ચ ઓપરેશન હાથ ધરવામાં આવ્યું હતું.

અત્યાર સુધીમાં માત્ર ત્રણ કન્ટેનરો ખોલીને તપાસ કરવામાં આવતા તેમાંથી કરોડોની કિંમતની વિદેશી સિગારેટનો જથ્થો મળી આવ્યો છે, અને હજુ બાકી રહેલાં ૧૫ જેટલા કન્ટેનરોની તપાસ ચાલુ હોવાથી સિગારેટના આ જથ્થાની બજાર કિંમત અને કૌભાંડનો આંકડો વધુ મોટો થવાની પ્રબળ શક્યતા છે.

તપાસમાં એવું પણ સામે આવ્યું છે કે આ તમામ કન્ટેનરો મુન્દ્રાથી રાજધાની દિલ્હી નજીક આવેલા તુઘલકાબાદ સ્થિત કન્ટેનર ડેપો તરફ રવાના થવાના હતા, પરંતુ માલ ગંતવ્ય સ્થાન સુધી પહોંચે તે પૂર્વે જ એજન્સીએ માસ્ટરમાઇન્ડ્સના મનસૂબા પર પાણી ફેરવી દીધું છે, અને આ પ્રકરણમાં અમદાવાદ તથા દિલ્હીમાંથી બે શંકાસ્પદ આરોપીઓની અટકાયત કરીને સઘન પૂછપરછ આદરવામાં આવી છે.

અગાઉ પણ મુન્દ્રા પોર્ટ પરથી પ્રતિબંધિત ઈ-સિગારેટ અને ફટાકડાના કન્સાઇનમેન્ટ પકડાઈ ચૂક્યા છે, ત્યારે આંતરરાષ્ટ્રીય સ્તરે સક્રિય આ સંગઠિત દાણચોરી ટોળકી અને કસ્ટમ હાઉસ એજન્ટોની ભૂમિકા અંગે દેશવ્યાપી સ્તરે તપાસનો વ્યાપ વધારીને કડીઓ મેળવવામાં આવી રહી છે.