લાસા : તા.૦૩: પૂર અને કુદરતી આફતો સામે ઝઝૂમી રહેલા હિમાલયન પ્રદેશ તિબેટ અને નેપાળમાં મુશ્કેલીઓ શમવાનું નામ નથી લઈ રહી. પૂરના કારણે સર્જાયેલી ભારે તબાહી વચ્ચે હવે તિબેટ-નેપાળ સરહદી વિસ્તારમાં ૫.૦ ની તીવ્રતાનો શક્તિશાળી ભૂકંપ આવતાં આખા પ્રદેશમાં ભારે દહેશત વ્યાપી ગઈ છે. જર્મન રિસર્ચ સેન્ટર ફોર જીઓસાયન્સિસ (GFZ) ના જણાવ્યા અનુસાર, આ આંચકો જમીનથી આશરે ૧૦ કિલોમીટરની ઊંડાઈએ નોંધાયો હતો.

આ પ્રદેશમાં ગયા સપ્તાહથી પૂર અને ભૂસ્ખલને ભયાનક વિનાશ સર્જ્યો છે. પૂરના કારણે અત્યાર સુધીમાં ૧,૨૦૦થી વધુ લોકોના મોતની પુષ્ટિ થઈ ચૂકી છે, જ્યારે ૨,૦૦૦થી વધુ લોકો હજુ પણ ગુમ છે. કેટલાંક અહેવાલો તો આ આંકડો ૪,૨૦૦ને પાર પહોંચ્યો હોવાનું પણ જણાવી રહ્યા છે. આ પરિસ્થિતિ વચ્ચે ભૂકંપનો તાજો આંચકો આવતાં નીચાણવાળા વિસ્તારોમાં ફરી એકવાર કોઈ મોટો કુદરતી પકોપ ત્રાટકશે કે કેમ તેવી ભીતિ સર્જાઈ છે.

ચીન સરકાર દ્વારા માધ્યમોના કવરેજ પર આકરા નિયંત્રણો લાદવામાં આવ્યા હોવા છતાં, રાહત અને બચાવ કાર્યના અહેવાલો સતત સામે આવી રહ્યા છે. સરહદ પર સ્થિત ગાયરોંગ સરહદી માર્ગ ફરીથી શરૂ કરવામાં આવ્યો છે, જેથી પૂરગ્રસ્ત વિસ્તારોમાં ભારે મશીનરી અને રાહત સામગ્રી સરળતાથી પહોંચાડી શકાય. ભારત, ચીન અને નેપાળના નિષ્ણાતો તથા બચાવ દળો અહોરાત કામગીરીમાં જોડાયેલા છે.

ભૂકંપના તાજેતરના આંચકાથી અત્યાર સુધીમાં કોઈ મોટા નુકસાનના સમાચાર નથી, પરંતુ પૂરના કારણે જમા થયેલો કાટમાળ ખસેડવામાં અને ગુમ થયેલા લોકોને શોધવામાં મહિનાઓ નીકળી જાય તેવી શક્યતા છે.