નાસિક: મહારાષ્ટ્રના રાજકારણમાં ફરી એકવાર અણધારી હલચલ જોવા મળી રહી છે. મુખ્યમંત્રી દેવેન્દ્ર ફડણવીસ અને શિવસેના (UBT) પ્રમુખ ઉદ્ધવ ઠાકરે વચ્ચે મુંબઈમાં મુખ્યમંત્રીના સત્તાવાર નિવાસસ્થાને 'ગુપ્ત મુલાકાત' થઈ હોવાના અહેવાલો વહેતા થતા જ રાજકીય વર્તુળોમાં તર્ક-વિતર્ક શરૂ થઈ ગયા છે. જોકે, શનિવારે મુખ્યમંત્રી દેવેન્દ્ર ફડણવીસે આ તમામ અહેવાલોને પાયાવિહોણા ગણાવીને મુલાકાતનો સ્પષ્ટ ઈનકાર કર્યો છે.

નાસિકના ત્ર્યંબકેશ્વર ખાતે ભગવાન શિવના દર્શન કર્યા બાદ પત્રકારો સાથે વાતચીત કરતા દેવેન્દ્ર ફડણવીસે આ મુદ્દે ખુલાસો કર્યો હતો. તેમણે પ્રશ્ન કર્યો હતો કે, "ઉદ્ધવ ઠાકરે સાથે ગુપ્ત રીતે મળવાનું કોઈ કારણ જ નથી. અમારી પાસે એવી કોઈ બાબત નથી કે જેની અમારે બંધ બારણે કે ગુપ્ત રીતે ચર્ચા કરવી પડે. જો ઉદ્ધવ ઠાકરે મને મળવા માંગતા હોય અથવા મારે તેમને મળવાનું હોય, તો અમે જાહેરમાં અને ખુલ્લેઆમ મળી શકીએ છીએ."

અટકળોનું બજાર ગરમ:

છેલ્લા ૨૪ કલાકથી મહારાષ્ટ્રના મીડિયા જગતમાં એવી ચર્ચાઓએ જોર પકડ્યું હતું કે જૂના સાથીદારો અને હવેના રાજકીય પ્રતિસ્પર્ધીઓ વચ્ચે કોઈ મોટા સમીકરણો પર મંથન થયું છે. ખાસ કરીને આવનારી ચૂંટણીઓ અને બદલાતા રાજકીય પ્રવાહ વચ્ચે આ કથિત મુલાકાતને અત્યંત મહત્વની માનવામાં આવતી હતી. પરંતુ ફડણવીસના નિવેદન બાદ આ ચર્ચાઓ પર હાલ પૂરતું પૂર્ણવિરામ મુકાયું હોય તેમ લાગે છે.

ભક્તિ અને રાજનીતિ:

ત્ર્યંબકેશ્વર જ્યોતિર્લિંગના દર્શન કરીને બહાર આવેલા મુખ્યમંત્રીએ રાજ્યની શાંતિ અને સમૃદ્ધિ માટે પ્રાર્થના કરી હતી. તેમણે ઉમેર્યું કે રાજકારણમાં અફવાઓ ફેલાવવી એ સામાન્ય બાબત છે, પરંતુ જનતાએ આવી પાયાવિહોણી વાતો પર વિશ્વાસ ન કરવો જોઈએ. ઉલ્લેખનીય છે કે, ૨૦૧૯ પછી શિવસેનામાં પડેલા ભંગાણ અને ત્યારબાદ સત્તાના પરિવર્તન પછી ઠાકરે અને ફડણવીસ વચ્ચેના સંબંધોમાં ભારે કડવાશ જોવા મળી છે, ત્યારે આ પ્રકારની મુલાકાતના અહેવાલો માત્ર ચર્ચાનું કેન્દ્ર બનીને રહી ગયા છે.