સીઓલ | તા. 27: વૈશ્વિક સ્તરે કૃત્રિમ બુદ્ધિ (AI) ની વધી રહેલી માંગ વચ્ચે સેમસંગ ઇલેક્ટ્રોનિક્સના કર્મચારીઓ માટે ખુશીના સમાચાર સામે આવ્યા છે. મહિનાઓ સુધી ચાલેલી વાટાઘાટો, વિવાદો અને છેલ્લી ઘડીએ હડતાળની ધમકીઓ પછી, સેમસંગે તેના કર્મચારીઓ સાથે એક સીમાચિહ્નરૂપ 'નફા-વહેંચણી કરાર' પર હસ્તાક્ષર કર્યા છે. મંગળવારે યોજાયેલા મતદાનમાં કંપનીના ૭૪ ટકા મજૂર સંઘ સભ્યોએ આ સોદાને પોતાની મંજૂરીની મહોર લગાવી દીધી છે. આ કરાર હેઠળ, કંપની તેના ઓપરેટિંગ નફાના ૧૦.૫ ટકા હિસ્સો અંદાજે ૭૮,૦૦૦ કર્મચારીઓમાં વહેંચશે.
બુધવાર, તા. 27 મેના રોજ આ સમાચારની ગૂંજ:
આ કરારની સૌથી આકર્ષક વાત તે છે કે તેમાં બોનસની રકમ કર્મચારીઓની કામગીરી સાથે જોડવામાં આવી છે. બોનસ પૂલના ૪૦ ટકા તમામ કર્મચારીઓમાં સમાન રીતે વહેંચવામાં આવશે, જ્યારે બાકીના ૬૦ ટકા વ્યક્તિગત અને વિભાગીય પ્રદર્શનના આધારે નક્કી થશે. કંપનીના અત્યંત નફાકારક ગણાતા 'મેમરી-ચીપ' વિભાગના કર્મચારીઓને સરેરાશ ૩.૮ કરોડ રૂપિયા જેટલું તોતિંગ બોનસ મળવાની ધારણા છે, જ્યારે કોન્ટ્રાક્ટ ચિપ ઉત્પાદન વ્યવસાયમાં જોડાયેલા કામદારોને પણ ૧ થી ૧.૫ કરોડ રૂપિયા સુધીનું બોનસ મળી શકે છે.
શું હતું આખા વિવાદનું મૂળ?
સેમસંગના સેમિકન્ડક્ટર વ્યવસાયમાં AI ચિપ્સની માંગને કારણે જે તેજી આવી, તેનો નફાકારક હિસ્સો કર્મચારીઓ પણ મેળવવા માંગતા હતા. આ બાબતે વેતન વધારા અને બોનસને લઈને કંપની મેનેજમેન્ટ અને યુનિયન વચ્ચે ખેંચતાણ ચાલી રહી હતી. વિવાદ એટલો વકર્યો હતો કે કર્મચારીઓ કામ છોડીને હડતાળ પર ઉતરવાની તૈયારીમાં હતા. જોકે, દક્ષિણ કોરિયાના રાષ્ટ્રીય શ્રમ સંબંધ પંચની દરમિયાનગીરી બાદ ૨૦ મેના રોજ મેનેજમેન્ટ અને મજૂર સંગઠનો વચ્ચે છેલ્લી ઘડીએ સમાધાન થયું હતું.
સેમિકન્ડક્ટર જગતમાં સેમસંગનો દબદબો
આ કરાર એવા સમયે આવ્યો છે જ્યારે સેમસંગ સહિત SK Hynix અને Micron જેવી કંપનીઓ AI ઈન્ફ્રાસ્ટ્રક્ચરમાં રોકાણના જોરે ૧ ટ્રિલિયન ડોલરના માર્કેટ કેપિટલાઇઝેશનના આંકડાને સ્પર્શી ચૂકી છે. SK Hynix પણ આ પહેલા કર્મચારીઓ સાથે લાંબા ગાળાના નફા-વહેંચણી કરાર કરી ચૂક્યું છે. નિષ્ણાતોના મતે, આ પગલું વૈશ્વિક ટેક કંપનીઓ પર વધતા તે દબાણને દર્શાવે છે, જેમાં AI તેજીનો નાણાકીય લાભ કંપનીએ તેના મહેનતુ કાર્યબળ સાથે વહેંચવો અનિવાર્ય બની ગયો છે. આ કરારથી હવે સેમસંગમાં લાંબા સમયથી ચાલી આવતો મજૂર વિવાદ પૂર્ણવિરામની દિશામાં આગળ વધ્યો છે.