નવી દિલ્હી : તબીબી વિજ્ઞાનના ઈતિહાસમાં ૨૫ જુલાઈનો દિવસ એક અવિસ્મરણીય અને સુવર્ણ અક્ષરે લખાયેલો દિવસ છે. આ એ જ ઐતિહાસિક દિવસ છે જ્યારે વિજ્ઞાને કુદરતના નિયમોને એક નવો વળાંક આપ્યો અને લાખો નિઃસંતાન દંપતીઓના જીવનમાં માતૃત્વ અને પિતૃત્વનું સુખ મેળવવાની નવી આશા જગાવી. આપણે વાત કરી રહ્યા છીએ વિશ્વના પ્રથમ ઇન-વિટ્રો ફર્ટિલાઇઝેશન (IVF) એટલે કે 'ટેસ્ટ-ટ્યુબ બેબી' ટેકનોલોજી દ્વારા થયેલા બાળક જન્મની.

૨૫ જુલાઈ ૧૯૭૮: જ્યારે ચમત્કાર સાકાર થયો

૨૫ જુલાઈ, ૧૯૭૮ ના રોજ ઈંગ્લેન્ડમાં વિશ્વની સર્વપ્રથમ ટેસ્ટ-ટ્યુબ બેબી લુઇસ જોય બ્રાઉન (Louise Joy Brown) નો જન્મ થયો હતો. લુઇસના માતા-પિતા લેસ્લી અને જોન બ્રાઉન નવ વર્ષથી સંતાન સુખ માટે ભટકતા હતા. ડોક્ટરોએ સ્પષ્ટ કહી દીધું હતું કે તેમની ફેલોપિયન ટ્યુબ બ્લોક હોવાથી તેમનું માતા બનવું અશક્ય છે. પરંતુ બ્રિટિશ સંશોધકો - ફિઝિયોલોજિસ્ટ રોબર્ટ એડવર્ડ્સ અને ગાયનેકોલોજિસ્ટ પેટ્રિક સ્ટેપ્ટોની વર્ષોની મહેનતે આ 'અશક્ય' દાવાને ખોટો સાબિત કરી બતાવ્યો.

વૈશ્વિક તબીબી ક્ષેત્રે નવી ક્રાંતિનો પ્રારંભ

લુઇસ જોય બ્રાઉનના સફળ જન્મે માત્ર ઈતિહાસ જ નથી રચ્યો, પરંતુ પ્રોજનન સ્વાસ્થ્ય (Reproductive Medicine) ક્ષેત્રે એક અદ્ભુત ક્રાંતિ સર્જી. આ સફળતા બાદ IVF ટેકનોલોજી વિશ્વભરમાં ફેલાઈ અને આજે આધુનિક વિજ્ઞાનના પ્રતાપે કરોડો પરિવાર પોતાના બાળકના સપનાને સાકાર કરી શક્યા છે. ૨૫ જુલાઈનો આ દિવસ વિજ્ઞાનની અદભુત સિદ્ધિ અને માનવ આશાના સૌથી મોટા વિજય તરીકે ઉજવવામાં આવે છે.