ચેન્નઈ: કલ્પના કરો કે તમારી નવી ઓફિસમાં પહેલો દિવસ હોય અને તમે જોશમાં ત્યાં પહોંચો, પરંતુ HR તમને એમ કહીને પાછા મોકલે કે તમે તમારા જરૂરી દસ્તાવેજો લાવ્યા નથી! તમિલનાડુમાં સુપરસ્ટાર વિજયની આગેવાની હેઠળની TVK સરકારના સૌથી નાની વયના મંત્રી એસ. કીર્થના સાથે સોમવારે વિધાનસભામાં કંઈક આવું જ બન્યું. શપથ ગ્રહણ સમારોહ દરમિયાન કીર્થના પોતાનું ‘ચૂંટણી પ્રમાણપત્ર’ (Election Certificate) રજૂ ન કરી શકતા તેમણે શપથ લીધા વિના જ પોતાની સીટ પર પરત ફરવું પડ્યું હતું.

શું બની ઘટના?

વિધાનસભાના મુખ્ય સચિવ કે. શ્રીનિવાસને જ્યારે એસ. કીર્થનાના નામની જાહેરાત કરી, ત્યારે તેઓ પૂરા આત્મવિશ્વાસ સાથે પોડિયમ તરફ ચાલ્યા. ત્યાં મુખ્યમંત્રી જોસેફ સી. વિજય પણ બેઠેલા હતા. જેવી કીર્થના શપથ લેવા માટે નજીક પહોંચી, સચિવે તેમને નિયમ મુજબ ચૂંટણી જીત્યાનું પ્રમાણપત્ર માંગ્યું. કીર્થના પાસે તે સમયે આ દસ્તાવેજ હાજર નહોતો. સચિવે નમ્રતાપૂર્વક તેમને અટકાવ્યા અને જણાવ્યું કે પ્રમાણપત્ર વિના શપથ લેવાની મંજૂરી આપી શકાય નહીં. આ ક્ષણના વીડિયો સોશિયલ મીડિયા પર જોરદાર વાયરલ થઈ રહ્યા છે.

કોણ છે આ ‘હિન્દી ભાષી’ મંત્રી?

૨૯ વર્ષની ઉંમરે મંત્રી બનેલા એસ. કીર્થના શિવકાસી બેઠક પરથી ચૂંટાઈ આવ્યા છે. તેમણે શિવકાસીમાં છેલ્લા સાત દાયકાથી ચાલી આવતા પુરુષોના વર્ચસ્વનો અંત લાવીને પ્રથમ મહિલા ધારાસભ્ય બનવાનું બહુમાન મેળવ્યું છે. અનુસ્નાતક થયેલા કીર્થના અનેક ભાષાઓમાં નિપુણ છે, પરંતુ તમિલનાડુના રાજકારણમાં સૌથી વધુ ચર્ચા તેમના હિન્દી પરના મજબૂત પ્રભુત્વને કારણે થઈ રહી છે.

વિજયના મંત્રીમંડળમાં એકમાત્ર મહિલા

સીએમ વિજયના નવા રચાયેલા મંત્રીમંડળમાં કુલ નવ મંત્રીઓ છે, જેમાં કીર્થના એકમાત્ર મહિલા મંત્રી છે. રવિવારે અન્ય મંત્રીઓએ શપથ લીધા હતા, પરંતુ સોમવારે વિધાનસભાની કાર્યવાહી દરમિયાન આ ટેકનિકલ ભૂલને કારણે કીર્થનાની શપથ વિધિ અટકી પડી હતી. જોકે, અધિકારીઓએ જણાવ્યું છે કે તેઓ જ્યારે પણ પોતાનું પ્રમાણપત્ર સબમિટ કરશે, ત્યારે તેમને શપથ લેવા દેવામાં આવશે.

શિવકાસીની નવી ઓળખ

‘ભારતની ફટાકડા રાજધાની’ તરીકે ઓળખાતા શિવકાસીમાં ૧૧,૬૯૭ મતોના માર્જિનથી જીત મેળવનાર કીર્થના હવે આ નવા વિવાદને કારણે રાષ્ટ્રીય સ્તરે ચર્ચામાં છે. લોકો આ ઘટનાને તેમની યુવાવસ્થાની ‘ભૂલ’ અને વહીવટી તંત્રની ‘ચુસ્તતા’ તરીકે જોઈ રહ્યા છે.