વોશિંગ્ટન, તા. 16 અમેરિકાના રાષ્ટ્રપતિ ડોનાલ્ડ ટ્રમ્પની ચીન મુલાકાત બાદ તાઈવાનને લઈને અમેરિકાની નીતિમાં મોટો ફેરફાર થવાના સંકેત મળ્યા છે. બેઇજિંગમાં રાષ્ટ્રપતિ શી જિનપિંગ સાથેની ઉચ્ચ સ્તરીય બેઠક બાદ ટ્રમ્પે સંકેત આપ્યા કે તેમનું વહીવટીતંત્ર તાઈવાનને હથિયારોનું વેચાણ અટકાવી શકે છે. ટ્રમ્પના આ નિવેદનથી તાઈપેઈ અને વોશિંગ્ટન બંનેમાં ખળભળાટ મચી ગયો છે.

ટ્રમ્પ ત્રણ દિવસની ચીન મુલાકાતે હતા જ્યાં તેમણે શી જિનપિંગ સાથે વેપાર, ટેરિફ અને ક્ષેત્રીય સુરક્ષા જેવા મુદ્દાઓ પર વિસ્તૃત ચર્ચા કરી હતી. બેઠક બાદ સંયુક્ત પત્રકાર પરિષદમાં ટ્રમ્પે કહ્યું કે અમેરિકા 'એક ચીન નીતિ'નું સન્માન કરે છે અને તાઈવાન સ્ટ્રેટમાં શાંતિ અને સ્થિરતા જાળવી રાખવા માંગે છે. તેમણે વધુમાં જણાવ્યું કે હથિયારોનું વેચાણ ક્ષેત્રમાં તણાવ વધારી શકે છે, તેથી આ મામલે પુનર્વિચાર કરવામાં આવશે.

અમેરિકા દાયકાઓથી તાઈવાનને રક્ષણાત્મક હથિયારો વેચતું આવ્યું છે. ટ્રમ્પના પ્રથમ કાર્યકાળમાં પણ તાઈવાનને અબજો ડોલરના હથિયારો વેચવાની મંજૂરી આપવામાં આવી હતી. જોકે ચીન મુલાકાત બાદ તેમના સૂરમાં આવેલા ફેરફારને વેપાર સમજૂતી સાથે જોડીને જોવામાં આવી રહ્યો છે. સૂત્રોના જણાવ્યા મુજબ ચીને અમેરિકી કૃષિ ઉત્પાદનોની ખરીદી વધારવા અને ટેરિફ ઘટાડવાની તૈયારી દર્શાવી છે, જેના બદલામાં તાઈવાન મુદ્દે નરમ વલણની અપેક્ષા રાખવામાં આવી છે.

ટ્રમ્પના આ નિવેદન બાદ તાઈવાનના વિદેશ મંત્રાલયે ચિંતા વ્યક્ત કરી છે. તાઈપેઈએ કહ્યું કે આત્મરક્ષા માટે હથિયારો જરૂરી છે અને અમેરિકા સાથેની ભાગીદારી પર વિશ્વાસ છે. અમેરિકામાં ડેમોક્રેટિક પાર્ટીના નેતાઓએ ટ્રમ્પના વલણનો વિરોધ કર્યો છે. સેનેટની વિદેશી સંબંધો સમિતિના સભ્યોએ કહ્યું કે તાઈવાનને એકલું છોડવું ચીનના આક્રમક વલણને પ્રોત્સાહન આપશે. વ્હાઈટ હાઉસે સ્પષ્ટતા કરી છે કે હજુ સુધી કોઈ અંતિમ નિર્ણય લેવાયો નથી અને તમામ વિકલ્પો પર વિચાર ચાલુ છે.