નવી દિલ્હી: વર્તમાન સમયમાં દુનિયાભરની કંપનીઓ ખર્ચ ઘટાડવા માટે આર્ટિફિશિયલ ઈન્ટેલિજન્સ (AI) અપનાવી રહી છે, પરંતુ હવે આ જ AI કંપનીઓ માટે આર્થિક બોજ બની રહ્યું હોય તેવું લાગી રહ્યું છે. Nvidia અને Uber જેવી દિગ્ગજ ટેક કંપનીઓના ટોચના અધિકારીઓએ સ્વીકાર્યું છે કે AI ઓટોમેશનનો ખર્ચ અપેક્ષા કરતાં ઘણો વધારે છે. સ્થિતિ એવી છે કે કેટલીક કંપનીઓમાં AI ટૂલ્સ અને કોમ્પ્યુટ પાવરનો ખર્ચ કર્મચારીઓના વાર્ષિક પગાર કરતાં પણ વધી ગયો છે.

Nvidia ના વાઇસ પ્રેસિડેન્ટ બ્રાયન કેટાન્ઝારોએ જણાવ્યું હતું કે તેમની ટીમ માટે કોમ્પ્યુટિંગનો ખર્ચ કર્મચારીઓના ખર્ચ કરતાં ઘણો વધારે છે. એ જ રીતે, Uber ના CTO પ્રવીણ નાગાએ પણ કબૂલ્યું કે AI ખર્ચના અંદાજો એટલી ઝડપથી વધ્યા છે કે તેમને જૂનું બજેટ બાજુ પર મૂકીને નવેસરથી વિચારવાની ફરજ પડી છે. સ્વાન AI (Swan AI) નામની એક નાની કંપનીના કિસ્સામાં તો માત્ર 4 કર્મચારીઓની ટીમને 'Anthropic' તરફથી એક મહિનાનું 1,13,000 ડોલરનું બિલ મળ્યું હતું, જે પ્રતિ કર્મચારી આશરે 28,000 ડોલર થાય છે.
આ વધતા ખર્ચ પાછળનું મુખ્ય કારણ 'ટોકન બેઝ્ડ પ્રાઇસિંગ' છે. કંપનીઓ જેટલું વધારે AI નો ઉપયોગ કરે છે, તેટલા વધુ ટોકન વપરાય છે અને બિલ વધતું જાય છે. MIT ના 2024 ના એક અભ્યાસ મુજબ, 77% કિસ્સાઓમાં માણસોએ AI કરતા વધુ કાર્યક્ષમ રીતે કામ કર્યું હોવાનું જાણવા મળ્યું છે. આમ છતાં, ટેક જાયન્ટ્સ હજુ પણ AI માં ભારે રોકાણ કરી રહ્યા છે. Uber ના 11% લાઈવ કોડ અપડેટ્સ હવે AI એજન્ટો દ્વારા લખવામાં આવે છે.
Nvidia ના CEO જેન્સન હુઆંગનું માનવું છે કે એન્જિનિયરોએ AI નો ઉપયોગ વધારવો જોઈએ. રિપોર્ટ અનુસાર, તેઓ ઈચ્છે છે કે 5,00,000 ડોલરનો પગાર લેતા એન્જિનિયર દર વર્ષે ઓછામાં ઓછા 2,50,000 ડોલર AI ટોકન્સ પાછળ ખર્ચે. હવે પ્રશ્ન એ ઉભો થયો છે કે શું AI નો આ ખર્ચ કામચલાઉ છે કે પછી તે ભવિષ્યમાં પણ કંપનીઓના બજેટમાં કાયમી કાણું પાડશે? આ હોવા છતાં, ઘણી કંપનીઓ હજુ પણ AI ના બહાને છટણી ચાલુ રાખી રહી છે, જે લાંબા ગાળે અર્થતંત્ર માટે પડકારરૂપ બની શકે છે.