નવી દિલ્હી : યુરોપના સૌથી સુંદર અને સમૃદ્ધ દેશોમાંના એક એવા જર્મનીની મુસાફરી કરવાનું સપ્નું કોનું નથી હોતું? જો તમે પણ આ વર્ષે જર્મની પ્રવાસ, બિઝનેસ અથવા અભ્યાસ માટે જવાનું વિચારી રહ્યા છો, તો આ ખબર તમારા માટે ખૂબ જ મહત્વપૂર્ણ છે. જર્મનીના વિઝા મેળવવા માટે માત્ર ઉત્સાહ પૂરતો નથી, પરંતુ ચોક્કસ અને સચોટ દસ્તાવેજો (ડોક્યુમેન્ટ્સ) હોવા અનિવાર્ય છે. નેશનલ કે શેંગેન વિઝા માટે અરજી કરતી વખતે નાની સરખી ભૂલ અથવા અધૂરા કાગળો તમારી આખી ટ્રીપ પર પાણી ફેરવી શકે છે અને વિઝા રિજેક્શનનું કારણ બની શકે છે.
આટલા બેઝિક ડોક્યુમેન્ટ્સ તો જોઈશે જ જોઈશે
જર્મની એમ્બેસી અથવા વિઝા એપ્લિકેશન સેન્ટર (VFS) માં સબમિટ કરવા માટેના મુખ્ય દસ્તાવેજોની યાદી નીચે મુજબ છે:
•    સંપૂર્ણ અને સાચી માહિતી સાથે ભરેલું વિઝા એપ્લિકેશન ફોર્મ.
•    ઓછામાં ઓછી ૬ મહિનાની માન્યતા ધરાવતો પાસપોર્ટ.
•    બાયોમેટ્રિક નિયમો અનુસારના તાજેતરના બે પાસપોર્ટ સાઇઝ ફોટોગ્રાફ્સ.
•    હોટેલ બુકિંગ અથવા જર્મનીમાં રહેવાના સ્થાનનો પાકો પુરાવો.
•    કન્ફર્મ રાઉન્ડ-ટ્રીપ ફ્લાઇટ ટિકિટ અથવા આખો ટ્રાવેલ પ્લાન (Itinerary).
•    વિઝા ફી ચુકવણીની સત્તાવાર રસીદ.
•    કંપની કે સંસ્થા તરફથી મળેલું નો-ઓબ્જેક્શન સર્ટિફિકેટ (NOC) (જો લાગુ પડતું હોય).
ખિસ્સામાં કેટલા પૈસા હોવા જોઈએ? વીમાના નિયમો શું છે?
જર્મની સરકાર એ સુનિશ્ચિત કરવા માંગે છે કે તમે ત્યાં જઈને આર્થિક રીતે પરેશાન ન થાઓ. આ માટે સત્તાવાર માર્ગદર્શિકા અનુસાર, અરજદારે જર્મનીમાં રહેવાના સમયગાળા દરમિયાન દરરોજના ઓછામાં ઓછા €૪૫ (આશરે ૪,૦૦૦ રૂપિયાથી વધુ) ની આર્થિક સક્ષમતા દર્શાવવી પડશે. આ માટે છેલ્લા ૬ મહિનાનું બેંક સ્ટેટમેન્ટ અથવા સ્પોન્સરશિપ લેટર આપવો પડશે.
આ ઉપરાંત, ટ્રાવેલ હેલ્થ ઇન્સ્યોરન્સ (મુસાફરી આરોગ્ય વીમો) અત્યંત ફરજિયાત છે. આ ઇન્સ્યોરન્સ પોલિસી તમામ શેંગેન દેશોમાં માન્ય હોવી જોઈએ અને તેમાં ઓછામાં ઓછું €૩૦,૦૦૦ (આશરે ૨૭ લાખ રૂપિયા) નું મેડિકલ કવરેજ હોવું જરૂરી છે.
તમારી પ્રોફાઇલ પ્રમાણે બદલાઈ જશે કાગળોની યાદી
જર્મની ઓથોરિટી અરજદારની રોજગાર સ્થિતિના આધારે વધારાના દસ્તાવેજો માંગે છે:
અરજદારની શ્રેણી    જરૂરી વધારાના દસ્તાવેજો
નોકરીયાત (Employees)    રોજગાર કરાર (Employment Contract), ૬ મહિનાનું બેંક સ્ટેટમેન્ટ, ઓફિશિયલ લીવ અપ્રૂવલ લેટર અને ઇન્કમ ટેક્સ રિટર્ન (ITR).
વેપારી/સ્વ-રોજગાર (Self-Employed)    બિઝનેસ લાયસન્સ/જીએસટી, કંપનીનું બેંક સ્ટેટમેન્ટ અને બિઝનેસ આઇટીઆર.
વિદ્યાર્થીઓ (Students)    શાળા કે યુનિવર્સિટીમાં નોંધણીનો પુરાવો (Enrollment Proof) અને સંસ્થાનું NOC.
નિવૃત્ત લોકો (Retirees)    છેલ્લા ૬ મહિનાનું સત્તાવાર પેન્શન સ્ટેટમેન્ટ.
બાળકો (સગીરો) અને આમંત્રણ પત્ર માટેના કડક નિયમો
જો તમે પરિવાર સાથે કે બાળકો સાથે મુસાફરી કરી રહ્યા છો, તો સગીર બાળકો માટે જન્મ પ્રમાણપત્ર, માતા-પિતા અથવા કાનૂની વાલીઓની સત્તાવાર સંમતિનો પત્ર (Consent Letter) અને તેમના આઈડી પ્રૂફ જોડવા પડશે. વળી, જો તમે જર્મનીમાં રહેતા કોઈ સંબંધી કે મિત્રને મળવા જતા હોવ તો તેમનો 'ઇન્વિટેશન લેટર' (આમંત્રણ પત્ર) અને જો બિઝનેસ કોન્ફરન્સ માટે જતા હોવ તો આયોજક કંપનીનો સત્તાવાર પત્ર જોડવો જરૂરી છે.
ખાસ નોંધ: દૂતાવાસ અને કોન્સ્યુલેટના નિયમો સમયાંતરે બદલાતા રહે છે. તેથી, કોઈપણ વિઝા અરજી સબમિટ કરતાં પહેલાં સત્તાવાર વેબસાઇટ પર જઈને નવીનતમ અપડેટ્સ ચોક્કસ ચેક કરી લેવા હિતાવહ છે.