દુબઈ, તા.૨૨: મધ્ય પૂર્વમાં ચાલી રહેલા યુએસ-ઇઝરાયેલ-ઈરાન સંઘર્ષની અસર માત્ર સરહદો પર જ નહીં, પરંતુ દુબઈના આલીશાન આતિથ્ય ક્ષેત્ર પર પણ જોવા મળી રહી છે. યુદ્ધને કારણે પ્રવાસીઓના પ્રવાહમાં આવેલા નોંધપાત્ર ઘટાડાને દુબઈની ટોચની હોટલોએ એક ‘વ્યૂહાત્મક તક’ તરીકે ઝડપી લીધી છે. દુબઈની આઈકોનિક હોટલોએ નવીનીકરણ (Renovation) અને સુરક્ષા વ્યવસ્થા મજબૂત કરવા માટે તેમના દરવાજા કામચલાઉ ધોરણે બંધ કર્યા છે.
આઈકોનિક હોટલોમાં મોટા ફેરફાર
દુબઈની ઓળખ સમાન સઢ આકારની બુર્જ અલ અરબ હોટલે ૧૯૯૯માં ખુલ્યા પછી પ્રથમવાર ૧૮ મહિનાના મોટા પુનઃસ્થાપન કાર્યક્રમ માટે બંધ રહેવાની જાહેરાત કરી છે. નોંધનીય છે કે ગયા મહિને ઈરાની હુમલા દરમિયાન ડ્રોન કાટમાળથી મિલકતને સામાન્ય નુકસાન થયું હતું. એવી જ રીતે, બુર્જ ખલીફામાં સ્થિત અરમાની હોટેલ પણ ૨૦૨૬ના છેલ્લા ક્વાર્ટર સુધી વ્યાપક નવીનીકરણ માટે બંધ રહેશે.
સુરક્ષા અને નવી ટેકનોલોજી પર ભાર
માત્ર રંગ-રોગાન જ નહીં, પરંતુ હોટલો હવે ૧૧ સપ્ટેમ્બર અને ૨૦૦૮ના મુંબઈ હુમલા જેવી ઘટનાઓમાંથી પાઠ શીખીને તેમની સુરક્ષા વ્યવસ્થાને હાઈ-ટેક બનાવી રહી છે. નવા અપગ્રેડમાં દેખરેખ પ્રણાલી, કટોકટી પ્રોટોકોલ અને પરિમિતિ સુરક્ષામાં ધરખમ વધારો કરવામાં આવશે, જેથી ભવિષ્યમાં કોઈપણ આંચકા સામે મિલકત સુરક્ષિત રહે.
ચક્રીય વિરામ: ફરી ઉભરવાની તૈયારી
ઉદ્યોગના નિષ્ણાતો આ તબક્કાને ‘કાઉન્ટર-સાયક્લિકલ વ્યૂહરચના’ તરીકે જોઈ રહ્યા છે. જ્યારે માંગ ઓછી હોય ત્યારે નવીનીકરણ કરવાથી આવકમાં થતો વિક્ષેપ ઓછો રહે છે. એટલાન્ટિસ દુબઈ, સેન્ટ રેજીસ અને રેડિસન બ્લુ જેવી મિલકતો પણ આંશિક રીતે કામગીરી સ્થગિત કરીને અપગ્રેડેશન કરી રહી છે, જેથી જ્યારે બજાર ફરી પાટા પર આવે ત્યારે તેઓ વિશ્વના પ્રવાસીઓને નવો અને વધુ પ્રીમિયમ અનુભવ આપી શકે.
ભારતીય હોટેલ ચેઈન્સની રણનીતિ
દુબઈમાં કાર્યરત ભારતીય હોટેલ ચેઈન્સ જેવી કે તાજ અને લેમન ટ્રી એ અલગ રસ્તો અપનાવ્યો છે. તેઓ સંપૂર્ણપણે કાર્યરત છે પરંતુ ખર્ચ પર કડક નિયંત્રણ રાખવા માટે માનવશક્તિ અને વીજળી વપરાશમાં કાપ મૂકી રહ્યા છે. મહત્વની વાત એ છે કે, તાજ હોટલ્સે ઓપરેશનલ ખર્ચ ઘટાડવા છતાં તેમના ફ્રન્ટલાઈન કર્મચારીઓના મહેનતાણામાં કોઈ કાપ મૂક્યો નથી, જે તેમની માનવીય અભિગમની નીતિ દર્શાવે છે.
૨૦૨૫ના અંત સુધીમાં દુબઈ પાસે ૧.૫૪ લાખથી વધુ રૂમની ઇન્વેન્ટરી છે, જે તેને ન્યૂયોર્ક અને બેંગકોક જેવા શહેરો કરતા ઘણી આગળ રાખે છે. આ આધુનિકીકરણ બાદ દુબઈ ફરી એકવાર વિશ્વના પ્રવાસન નકશા પર વધુ મજબૂતીથી ઉભરી આવશે તે નક્કી છે.