તિરુવનંતપુરમ : કેરળના રાજકારણમાં હાલમાં ગરમાગરમ માહોલ સર્જાયો છે. વિધાનસભા ચૂંટણીમાં કારમી હારનો સામનો કર્યા બાદ સીપીએમ (CPM) પહેલેથી જ મુશ્કેલ સમયમાંથી પસાર થઈ રહી છે, ત્યાં હવે પૂર્વ મુખ્યમંત્રી પિનરાઈ વિજયનના નિવાસસ્થાને ઇડી (ED) ના દરોડાએ રાજ્યની રાજનીતિને હચમચાવી દીધી છે. મંગળવારે સાંજે શરૂ થયેલી આ કાર્યવાહી મોડી રાત સુધી ચાલી હતી. આ ઘટનાક્રમ બાદ વિજયને કેન્દ્ર સરકાર પર આકરા પ્રહાર કરતા તેને 'રાજકીય બદલાની ભાવના' ગણાવી છે. તેમણે આક્ષેપ કર્યો છે કે ભાજપ અને કોંગ્રેસ આ સમગ્ર ઘટનામાં એકમતે કામ કરી રહ્યા છે.
શું છે સમગ્ર મામલો?
આ દરોડા મુખ્યત્વે CMRL મની લોન્ડરિંગ કેસ સાથે જોડાયેલા છે, જેમાં ૧૮૨ કરોડ રૂપિયાના કૌભાંડની તપાસ ચાલી રહી છે. આરોપ છે કે આ કેસમાં પૂર્વ મુખ્યમંત્રીની પુત્રી વીણાને કથિત રીતે 'ફેક પેમેન્ટ' (ખોટી રીતે નાણાંની ચૂકવણી) કરવામાં આવી હતી. આ દરોડા દરમિયાન ઇડીની ટીમે કેરળમાં ૧૦ વિવિધ સ્થળોએ તપાસ હાથ ધરી હતી, જેમાં પિનરાઈ વિજયનનું નિવાસસ્થાન પણ સામેલ હતું. વિજયને આક્ષેપ કર્યો હતો કે ઇડી અધિકારીઓ ઉપરથી મળેલા નિર્દેશો મુજબ જ કામ કરી રહ્યા છે, જે દેશની વર્તમાન રાજકીય સ્થિતિ દર્શાવે છે.
રાજકીય આક્ષેપબાજી અને વિરોધ પ્રદર્શન
આ કાર્યવાહી સામે વિજયને કોંગ્રેસ નેતા રાહુલ ગાંધી પર પણ નિશાન સાધ્યું હતું. તેમણે યાદ અપાવ્યું કે ચૂંટણી પહેલાં રાહુલ ગાંધીએ જાહેરમાં પૂછ્યું હતું કે, "પિનરાઈના ઘરે દરોડા કેમ નથી પડતા?" આ ટિપ્પણીનો ઉલ્લેખ કરીને વિજયને દાવો કર્યો કે ભાજપ અને કોંગ્રેસ વિપક્ષના નેતાઓને કચડવા માટે કેન્દ્રીય એજન્સીઓનો ઉપયોગ કરી રહ્યા છે. દરોડા દરમિયાન વિજયનના ઘરની બહાર મોટી સંખ્યામાં એકઠા થયેલા સીપીએમ કાર્યકર્તાઓએ ભારે વિરોધ પ્રદર્શન કર્યું હતંન અને ઇડીના વાહનોના કાચ તોડી નાખ્યા હતા.
આગામી સમયમાં ગંભીર પરિણામોની શક્યતા
એક તરફ, રાજ્યના ગૃહ મંત્રાલયે આ દરોડા અંગે કોઈપણ પૂર્વ જાણકારી હોવાનો ઇનકાર કર્યો છે, તો બીજી તરફ વિજયને આને માત્ર શરૂઆત ગણાવી છે. તેમણે ચેતવણી આપી છે કે આવી રાજકીય ડિઝાઇન તેઓ પહેલા પણ જોઈ ચૂક્યા છે અને તેમની પાર્ટી ભાજપના આ 'ષડયંત્ર' સામે ઝૂકશે નહીં. આ સમગ્ર ઘટનાક્રમે કેરળના વહીવટીતંત્રને પણ હચમચાવી દીધું છે, જેમાં પૂર્વ મુખ્યમંત્રીના સુરક્ષાકર્મીઓને સસ્પેન્ડ કરવા જેવી કાર્યવાહી પણ સામે આવી છે. આ કેસ હવે કયા વળાંક પર પહોંચે છે અને રાજ્યમાં શું નવો રાજકીય વળાંક આવે છે, તે જોવું ખૂબ જ મહત્વનું બની રહેશે.