​ઇસ્લામાબાદ: પડોશી દેશ પાકિસ્તાનમાંથી એક મોટા સમાચાર સામે આવ્યા છે. પાકિસ્તાનના સૌથી મોટા અને સંવેદનશીલ ગણાતા બલૂચિસ્તાન પ્રાંતમાં શનિવારે સવારે ધરતી અચાનક ધ્રૂજી ઉઠી હતી. રિક્ટર સ્કેલ પર આ ભૂકંપની તીવ્રતા 5.7 નોંધવામાં આવી છે, જેને કારણે આસપાસના વિસ્તારોમાં ભારે દહેશત ફેલાઈ ગઈ હતી. અચાનક આવેલા આ આફતના આંચકાથી ડરിને લોકો પોતાના ઘરો અને ઓફિસમાંથી બહાર ખુલ્લા મેદાનમાં દોડી આવ્યા હતા.

​ક્યાં હતું ભૂકંપનું કેન્દ્રબિંદુ?

અમેરિકન ભૂગર્ભીય સર્વેક્ષણ (USGS) અને જર્મન રિસર્ચ સેન્ટર ફોર જિયોસાયન્સિસ (GFZ) દ્વારા પ્રાપ્ત અહેવાલો મુજબ, આ શક્તિશાળી ભૂકંપનું કેન્દ્ર બલૂચિસ્તાન પ્રાંતનું ઐતિહાસિક અને મહત્વપૂર્ણ ગણાતું ખુજદાર (Khuzdar) શહેર તથા તેની આસપાસનો વિસ્તાર રહ્યો હતો. ભૂકંપનું કેન્દ્ર ખુજદારથી આશરે 48 કિલોમીટર પશ્ચિમ-ઉત્તર પશ્ચિમ દિશામાં અને જમીનથી માત્ર 10 કિલોમીટરની ઊંડાઈએ હોવાનું સામે આવ્યું છે. છીછરી ઊંડાઈએ કેન્દ્ર હોવાને કારણે આંચકાની તીવ્રતા જમીન પર વધુ અનુભવાઈ હતી.

​સિંધ પ્રાંતમાં પણ અનુભવાયા આંચકા:

આ ભૂકંપના આંચકા માત્ર ખુજદાર કે બલૂચિસ્તાન પૂરતા સીમિત નહોતા, પરંતુ તેની અસર આસપાસના વિસ્તારોમાં પણ જોવા મળી હતી. પાડોશી સિંધ પ્રાંતના કેટલાક વિસ્તારોમાં પણ ધરતી હલી જવાની અનુભૂતિ થતા સ્થાનિક નાગરિકોમાં ગભરાટ ફેલાઈ ગયો હતો. સવારના સુમારે અચાનક થયેલી આ હિલચાલથી લોકોમાં અફરાતફરીનો માહોલ સર્જાયો હતો.

​પ્રાપ્ત માહિતી અનુસાર, તંત્ર દ્વારા સંવેદનશીલ વિસ્તારોમાં સ્થિતિ પર સતત નજર રાખવામાં આવી રહી છે. સદનસીબે, આ લખાય છે ત્યાં સુધી આ ભૂકંપના કારણે સત્તાવાર રીતે કોઈ જાનહાની કે મોટા આર્થિક નુકસાનના અહેવાલ પ્રાપ્ત થયા નથી, પરંતુ વહીવટી તંત્ર અને રાહત એજન્સીઓને પૂરતી સતર્ક રહેવા સૂચના આપવામાં આવી છે.