નવી દિલ્હી: પશ્ચિમ બંગાળના રાજકારણમાં અત્યાર સુધીના સૌથી મોટા રાજકીય સંકટનો સામનો કરી રહેલી તૃણમૂલ કોંગ્રેસ (TMC) માટે વધુ એક મોટો આંચકો સામે આવ્યો છે. ટીએમસીના ફાયરબ્રાન્ડ સાંસદ મહુઆ મોઇત્રા હવે કાનૂની મુસીબતોમાં ફસાયા છે. પક્ષના ૨૦ બળવાખોર સાંસદોએ મહુઆ મોઇત્રા સામે બદનક્ષીનો દાવો (Defamation Suit) દાખલ કરવાનો નિર્ણય લીધો છે. વિવાદનું કારણ મહુઆ દ્વારા કરવામાં આવેલો તે ગંભીર આરોપ છે, જેમાં તેમણે દાવો કર્યો હતો કે પક્ષ છોડનારા સાંસદોને ૪૦ કરોડ રૂપિયાની લાંચ આપવામાં આવી છે.
સમગ્ર વિવાદની શરૂઆત શિવસેના (UBT)ના સાંસદ સંજય રાઉતના એક નિવેદનથી થઈ હતી, જેમાં તેમણે મહારાષ્ટ્રના સાંસદોને ખરીદવા માટે ૧૫ કરોડની ઓફર મળ્યાનો દાવો કર્યો હતો. આના જવાબમાં મહુઆ મોઇત્રાએ કટાક્ષ કરતા સોશિયલ મીડિયા પર લખ્યું હતું કે, "માત્ર ૧૫ કરોડ? તેઓ આટલા સસ્તામાં કેમ વેચાઈ રહ્યા છે? અમારા સાંસદોને તો પહેલા ૪ કરોડ અને ત્યારબાદ આગામી ૩૬ મહિના સુધી દર મહિને ૧ કરોડ રૂપિયા એટલે કે કુલ ૪૦ કરોડ રૂપિયા મળ્યા છે." મહુઆના આ નિવેદને રાજકીય વર્તુળોમાં ભારે હોબાળો મચાવ્યો છે.
આ વિવાદ વચ્ચે ટીએમસીમાં થયેલા મોટા ભાગલાએ મમતા બેનર્જીના પાયા હચમચાવી દીધા છે. કાકોલી ઘોષ દસ્તીદારના નેતૃત્વ હેઠળ ૨૮માંથી ૨૦ સાંસદોએ પક્ષ સાથે છેડો ફાડીને 'નેશનલિસ્ટ સિટીઝન્સ પાર્ટી ઓફ ઇન્ડિયા' (NCPI)માં વિલીનીકરણ કરી લીધું છે. જોકે આ જૂથ ભાજપમાં જોડાયું નથી, પરંતુ તેણે NDAને ટેકો જાહેર કરીને મમતા સરકારની મુશ્કેલીઓ વધારી દીધી છે. ૧૯૯૮માં પક્ષની સ્થાપના બાદ આ પ્રથમ વખત છે જ્યારે ટીએમસી આટલી નબળી સ્થિતિમાં જોવા મળી રહી છે.
માત્ર લોકસભા જ નહીં, પરંતુ પશ્ચિમ બંગાળની વિધાનસભામાં પણ બળવાનો સૂર ઉઠ્યો છે. ઋતબ્રત બેનર્જીના નેતૃત્વમાં ૬૪ જેટલા ધારાસભ્યોએ બળવો કરીને તેમને વિધાનસભામાં વિરોધ પક્ષના નેતા તરીકે જાહેર કર્યા છે. પક્ષના આ આંતરિક કલહ અને પૈસાની લેતી-દેતીના આરોપોએ બંગાળના રાજકારણને સંપૂર્ણપણે બદલી નાખ્યું છે. હવે જોવાનું એ રહેશે કે શું મહુઆ મોઇત્રા આ કાનૂની જંગમાં પોતાના આરોપો સાબિત કરી શકશે કે પછી બળવાખોર સાંસદો દ્વારા દાખલ કરવામાં આવનાર બદનક્ષીનો દાવો તેમના માટે રાજકીય અંત લાવશે.