નવી દિલ્હી : રાજધાની નવી દિલ્હીમાં યોજાયેલી ૧૮મી બ્રિક્સ (BRICS) શિખર સંમેલન ૨૦૨૬ દરમિયાન ભારત અને દક્ષિણ આફ્રિકા વચ્ચેના વ્યાપારિક અને આર્થિક સંબંધોને વધુ ગાઢ બનાવવાના હેતુથી એક અત્યંત મહત્ત્વપૂર્ણ બેઠક યોજાઈ હતી. દક્ષિણ આફ્રિકાના રાષ્ટ્રપતિ સિરિલ રામાફોસાએ અદાણી ગ્રુપના ચેરમેન ગૌતમ અદાણી સાથે ખાસ મુલાકાત કરી હતી. દક્ષિણ આફ્રિકાના સરકારી વિદેશી બાબતોના વિભાગ દ્વારા સોશિયલ મીડિયા પ્લેટફોર્મ 'X' પર આ બેઠકની સત્તાવાર જાહેરાત કરવામાં આવી હતી, જેને બંને દેશો વચ્ચેના વેપારી જોડાણ માટે ગેમ-ચેન્જર માનવામાં આવી રહી છે.

આ હાઈ-લેવલ બેઠકનો મુખ્ય ઉદ્દેશ્ય ભારત અને દક્ષિણ આફ્રિકા વચ્ચે દ્વિપક્ષીય વેપાર, ઉર્જા, બંદરો અને માળખાકીય સુવિધાઓ (ઈન્ફ્રાસ્ટ્રક્ચર) ના ક્ષેત્રમાં રોકાણને વેગ આપવાનો હતો. દક્ષિણ આફ્રિકા સરકાર આ સમિટનો ઉપયોગ 'આફ્રિકન કોન્ટિનેન્ટલ ફ્રી ટ્રેડ એરિયા' (AfCFTA) હેઠળ સમગ્ર આફ્રિકા ખંડમાં માળખાકીય વિકાસ અને ઔદ્યોગિકીકરણ માટે મોટા પાયે વિદેશી રોકાણ આકર્ષવા માટે કરી રહી છે. આ સંદર્ભમાં અદાણી ગ્રુપ જેવા વૈશ્વિક ઈન્ફ્રાસ્ટ્રક્ચર જાયન્ટ સાથેની રાષ્ટ્રપતિ રામાફોસાની વાતચીત ખૂબ જ મહત્વની માનવામાં આવે છે.

આ પ્રવાસ દરમિયાન રાષ્ટ્રપતિ રામાફોસા સાથે દક્ષિણ આફ્રિકાના આંતરરાષ્ટ્રીય સંબંધો, વેપાર અને ઉદ્યોગ મંત્રાલયના ઉચ્ચ અધિકારીઓ અને મંત્રીઓનું મજબૂત પ્રતિનિધિમંડળ પણ જોડાયું છે. શનિવારે આયોજિત 'ઈન્ડિયા-સાઉથ આફ્રિકા બિઝનેસ લીડરશિપ રાઉન્ડટેબલ' માં પણ રાષ્ટ્રપતિ રામાફોસા બંને દેશોના અગ્રણી ઉદ્યોગપતિઓને સંબોધિત કરશે. બ્રિક્સ બિઝનેસ ફોરમ અને આ દ્વિપક્ષીય બેઠકોથી બંને દેશો વચ્ચે સપ્લાય ચેઈન, ડિજિટલ ઈકોનોમી અને કૃષિ ક્ષેત્રે સહયોગના નવા દ્વાર ખુલશે.