મુંબઈ : એન્ફોર્સમેન્ટ ડિરેક્ટોરેટ (ED) દ્વારા બુધવારના રોજ મુંબઈ અને ગુજરાતમાં કુલ ૧૧ ઠેકાણાઓ પર સઘન શોધખોળ અને દરોડાની કાર્યવાહી હાથ ધરવામાં આવી છે. આ દરોડા જેલમાં બંધ કુખ્યાત ડ્રગ સ્મગ્લર નવીન ચિચકર સાથે સંકળાયેલા મની લોન્ડરિંગ કેસના સંદર્ભમાં કરવામાં આવ્યા છે.

આ સમગ્ર તપાસ નાર્કોટિક્સ કંટ્રોલ બ્યુરો (NCB) અને નવી મુંબઈ પોલીસના એન્ટી નાર્કોટિક્સ સેલ દ્વારા નોંધવામાં આવેલા કેસો પર આધારિત છે. શંકા છે કે નવીન ચિચકર કોકેઈન, હાઇડ્રોપોનિક કેનાબીસ (ગાંજો), એલએસડી (LSD) અને કેનાબીસ-યુક્ત ખાદ્ય પદાર્થોના વેચાણથી કરોડો રૂપિયાની કમાણી કરતો હતો અને આ નાણાં હવાલા નેટવર્ક તેમજ ક્રિપ્ટોકરન્સીના માધ્યમથી વિદેશોમાં મોકલતો હતો.

કેસની પૃષ્ઠભૂમિ અને કૌભાંડનો પર્દાફાશ:
આ મામલો જાન્યુઆરી ૨૦૨૫માં પ્રકાશમાં આવ્યો હતો, જ્યારે એનસીબી દ્વારા મુંબઈ એરપોર્ટ પર ઓસ્ટ્રેલિયા જઈ રહેલા એક પાર્સલને જપ્ત કરવામાં આવ્યું હતું. આ પાર્સલની અંદર એક પ્રોજેક્ટરની અંદર છુપાવીને દક્ષિણ અમેરિકાથી લાવવામાં આવેલું ૨૦૦ ગ્રામ કોકેઈન મળી આવ્યું હતું, જેના પગલે તપાસનો રેલો મુખ્ય સૂત્રધાર સુધી પહોંચ્યો હતો. આ કેસમાં મે ૨૦૨૫માં મલેશિયાથી ડિપોર્ટ કરીને નવીન ચિચકરની ધરપકડ કરવામાં આવી હતી, જ્યારે તેનો ભાઈ ધીરજ પણ મલેશિયાથી ભારત પરત ફરતા એજન્સીના સકંજામાં આવ્યો હતો.

આ કેસની તપાસ દરમિયાન એપ્રિલ ૨૦૨૫માં એક કરૂણ ઘટના સામે આવી હતી, જ્યારે બંને ભાઈઓની ડ્રગ કેસમાં સંડોવણી અંગે એનસીબી અને પોલીસ દ્વારા વારંવાર સમન્સ મોકલવાને કારણે થતી માનસિક ઉત્પીડન અને તણાવથી કંટાળીને તેમના ૫૦ વર્ષીય પિતા તથા બિલ્ડર ગુરુનાથ ચિચકરે બેલાપુર સ્થિત પોતાની ઓફિસમાં જાતે જ ગોળી મારીને આત્મહત્યા કરી લીધી હતી.

ક્રિપ્ટોકરન્સી અને હવાલા ઓપરેટરોની ભૂમિકા:
ઈડી (ED) ની તપાસમાં એવું બહાર આવ્યું છે કે ડ્રગ્સ વેચીને કમાયેલા નાણાંનું ક્રિપ્ટોકરન્સીમાં મોટાપાયે રોકાણ કરવામાં આવ્યું હતું. હવાલા ઓપરેટરો દ્વારા આ નાણાં યુએસ ડોલર સાથે જોડાયેલા સ્ટેબલકોઈન (USDT) અથવા થાઈ બાહ્ટના સ્વરૂપમાં નવીન ચિચકર સુધી પહોંચાડવામાં આવતા હતા. બુધવારના રોજ કરાયેલી આ સઘન શોધખોળનો મુખ્ય હેતુ ગુનાકીય પ્રવૃત્તિથી મેળવેલી સંપત્તિ (Proceeds of Crime) ના નાણાં ક્યાં અને કેવી રીતે ડાયવર્ટ કરવામાં આવ્યા તથા તેના મૂળને છુપાવવા માટે કેવા પેંતરા રચવામાં આવ્યા તેની કડીઓ મેળવવાનો છે.

આ તપાસે એવા એક આંતરરાષ્ટ્રીય ડ્રગ તસ્કરી સિન્ડિકેટ તરફ પણ ઈશારો કર્યો છે જે અમેરિકાથી કોકેઈન મેળવીને ભારત અને વિદેશી બજારોમાં તેનું વિતરણ કરતું હતું. આ સમગ્ર નેટવર્કને ચલાવવામાં એક ક્લિયરિંગ હાઉસ એજન્ટ અને કેટલાક હવાલ ઓપરેટરો પણ સક્રિયપણે મદદ કરી રહ્યા હોવાની આશંકા વ્યક્ત કરવામાં આવી રહી છે.