વોશિંગ્ટન : અમેરિકાના યુદ્ધ સચિવ પીટ હેગસેથે તાજેતરમાં વહીવટીતંત્રની લશ્કરી કાર્યવાહીઓ અને ઈરાન સાથેના સંઘર્ષના મુદ્દે પોતાના પર લાવવામાં આવેલા મહાભિયોગના પ્રસ્તાવ સામે આક્રમક વલણ અપનાવતા તેને દેશભક્તિ વિરુદ્ધ ગણાવ્યું છે.

પ્રાપ્ત વિગતો અનુસાર, રિપબ્લિકન પ્રતિનિધિ થોમસ માસી દ્વારા પેન્ટાગોન વડા સામે મહાભિયોગ ચલાવવાના પ્રયાસો શરૂ કરવામાં આવ્યા છે, જેના જવાબમાં હેગસેથે સ્પષ્ટ કર્યું છે કે આવા પગલાંથી અમેરિકન લશ્કરી કર્મચારીઓ અને નાગરિક નેતૃત્વનું મનોબળ તૂટી શકે છે.

હેગસેથે કડક શબ્દોમાં જણાવ્યું હતું કે આ પ્રકારના પ્રયાસો આપણા દુશ્મનો અને વિરોધીઓને એવો ખોટો સંકેત આપે છે કે યુનાઇટેડ સ્ટેટ્સ પોતાની જ સેનાને કાયદેસરની લશ્કરી કાર્યવાહી સફળતાપૂર્વક પાર પાડવા બદલ સજા કરી રહ્યું છે.

વહીવટીતંત્રની કાર્યવાહીનો બચાવ કરતા તેમણે અગાઉના રાષ્ટ્રપતિઓ જેમ કે રોનાલ્ડ રીગન, બિલ ક્લિન્ટન, બરાક ઓબામા અને જો બિડેનના સમયમાં થયેલા લશ્કરી હસ્તક્ષેપોનો ઉલ્લેખ કરી જણાવ્યું હતું કે ભૂતકાળમાં ક્યારેય કોઈ સંરક્ષણ મંત્રી સામે મહાભિયોગ ચલાવાયો નથી.

તેમણે ઉમેર્યું હતું કે ડોનાલ્ડ ટ્રમ્પના પ્રથમ કાર્યકાળ દરમિયાન પણ તેમની સામે બે વખત મહાભિયોગના નિરર્થક પ્રયાસો કરવામાં આવ્યા હતા અને હવે તેમના કેબિનેટ સભ્ય વિરુદ્ધ આ ત્રીજો પ્રયાસ કરવામાં આવી રહ્યો છે, જે માત્ર રાજકીય દ્વેષથી પ્રેરાયેલો છે.
 

આગામી સમયમાં આ રાજકીય વિવાદ વચ્ચે પેન્ટાગોન વડા દ્વારા રાષ્ટ્રપતિ ટ્રમ્પની રાષ્ટ્રીય સુરક્ષા નીતિઓ અને લશ્કરી મિશનને સંપૂર્ણ સમર્થન આપવાનું ચાલુ રાખવામાં આવશે તેવી સત્તાવાર જાહેરાત કરવામાં આવી છે.