નવી દિલ્હી, તા.૦૭: મુખ્ય ચૂંટણી કમિશનર જ્ઞાનેશ કુમાર વિરુદ્ધ કોંગ્રેસના સાંસદ રાહુલ ગાંધીની આગેવાનીમાં વિપક્ષી નેતાઓ દ્વારા કરવામાં આવેલા વિરોધ પ્રદર્શન અને ચૂંટણી પંચ સાથે તાકીદની મુલાકાતની માંગ વચ્ચે હવે ચૂંટણી પંચે સત્તાવાર નિવેદન જાહેર કરીને સમગ્ર સ્થિતિ સ્પષ્ટ કરી છે. ચૂંટણી પંચે જણાવ્યું છે કે તેમને કોઈપણ રાજકીય પક્ષના પ્રતિનિધિમંડળને મળવામાં કે તેમની સાથે ચર્ચા કરવામાં સહેજ પણ વાંધો નથી, પરંતુ તેના માટે પૂર્વ નિર્ધારિત પ્રક્રિયા અને નિર્ધારિત પ્રોટોકોલનું પાલન કરવું અનિવાર્ય છે.

ચૂંટણી પંચ દ્વારા આપવામાં આવેલી માહિતી મુજબ, મંગળવારે સાંજે ૪ વાગ્યા સુધી કોઈપણ રાજકીય પક્ષ તરફથી બેઠક યોજવા માટે સત્તાવાર સમય માંગવામાં આવ્યો ન હતો, જેના કારણે કોઈ બેઠક નિર્ધારિત થઈ શકી નહોતી. પંચે સ્પષ્ટતા કરી હતી કે વર્ષ ૨૦૨૫માં નક્કી કરવામાં આવેલા પ્રોટોકોલ મુજબ, કોઈપણ રાજકીય પક્ષે પોતાના અધિકૃત પ્રતિનિધિ મારફતે અગાઉથી સમય મેળવવાનો રહે છે. દિલ્હી પોલીસ દ્વારા પંચને માત્ર એટલી માહિતી મળી હતી કે રાહુલ ગાંધીના નેતૃત્વમાં સાંસદોનું પ્રતિનિધિમંડળ આવેદનપત્ર સોંપવા માંગે છે, જેના પર પંચ વિચાર કરી રહ્યું હતું.

દરમિયાન, વિપક્ષ તરફથી એવું જણાવાયું કે રાહુલ ગાંધી 'ઇન્ડિયા' ગઠબંધનના આશરે ૨૪૦ સાંસદો સાથે સંસદ ભવનના એનેક્સી ખાતે ચૂંટણી પંચ સાથે બેઠક કરવા માંગે છે. ચૂંટણી પંચે આ માંગણીને નિયમોથી વિપરીત અને અસામાન્ય ગણાવીને તેનો અસ્વીકાર કર્યો હતો, કારણ કે નિયમ અનુસાર આવી બેઠકો માત્ર ચૂંટણી પંચના અધિકૃત કાર્યાલય પરિસરમાં જ થઈ શકે છે. આ પરિસ્થિતિમાં પંચે એક વિશેષ વ્યવસ્થાનો પ્રસ્તાવ મૂક્યો હતો કે પંચના સૌથી સિનિયર કાર્યકારી અધિકારી સંસદ ભવન એનેક્સી ખાતે જઈને સાંસદો પાસેથી આવેદનપત્ર સ્વીકારી લેશે, પરંતુ વિપક્ષી સાંસદો આ પ્રસ્તાવ પર સહમત થયા નહોતા.

આ અસહમતિ બાદ રાહુલ ગાંધી અને પ્રિયંકા ગાંધી સહિત વિપક્ષના અનેક દિગ્ગજ નેતાઓ ચૂંટણી પંચને મળવાની જીદ સાથે આકાશવાણી ભવન પરિસરમાં ધરણા પર બેસી ગયા હતા. વિપક્ષનો મુખ્ય આક્ષેપ હતો કે ચૂંટણી પંચ તેમને મળવા માટે સમય ફાળવી રહ્યું નથી. બાદમાં સ્થિતિને ધ્યાનમાં રાખીને દિલ્હી પોલીસે પ્રદર્શન કરી રહેલા નેતાઓની અટકાયત કરી હતી અને પરિસરમાંથી હટાવ્યા હતા. આ બાદ રાજકીય માહોલ ગરમાયો છે અને વિવિધ પક્ષો વચ્ચે નિવેદનબાજી શરૂ થઈ છે.

ચૂંટણી પંચે પોતાના નિવેદનમાં પુનરોચ્ચાર કર્યો છે કે તેઓ લોકશાહી અને સંસદીય મર્યાદાઓનું સંપૂર્ણ સન્માન કરે છે. પંચે જણાવ્યું છે કે જો નિયમાનુસાર અને યોગ્ય માધ્યમથી પૂર્વ મંજૂરી માટે વિનંતી કરવામાં આવે, તો તેઓ કોઈપણ સમયે ચર્ચા કરવા માટે તૈયાર છે. સંસ્થાઓની ગરિમા જાળવીને જ લોકશાહીના કાર્યો થવા જોઈએ તેવું પંચ દ્વારા રેખાંકિત કરવામાં આવ્યું છે.

આ ઘટના પછી આગામી દિવસોમાં રાજકીય પક્ષો અને ચૂંટણી પંચ વચ્ચેના સંકલનને લઈને નવા નિયમોની ચર્ચા વધુ વેગ પકડી શકે છે. વિપક્ષ દ્વારા પંચની કાર્યપ્રણાલી પર સવાલો ઉઠાવવામાં આવી રહ્યા છે, ત્યારે પંચની આ સ્પષ્ટતા બાદ મામલો શાંત થાય છે કે કેમ તે જોવું રહ્યું. દેશની રાજનીતિમાં આ મુલાકાત અને વિરોધ પ્રદર્શન એક મોટો ચર્ચાનો વિષય બન્યા છે.