નવી દિલ્હી: ભારતના ચૂંટણી પંચ દ્વારા પશ્ચિમ બંગાળ વિધાનસભા સામાન્ય ચૂંટણી 2026ની મતગણતરી પ્રક્રિયાને ધ્યાનમાં રાખીને મહત્વના સુરક્ષાત્મક અને વહીવટી પગલાં લેવામાં આવ્યા છે. ચૂંટણી પંચે મતગણતરી કેન્દ્રો પર સુરક્ષા વ્યવસ્થા મજબૂત કરવા અને કાયદો તથા વ્યવસ્થાની સ્થિતિ પર દેખરેખ રાખવા માટે 165 વધારાના કાઉન્ટિંગ ઓબ્ઝર્વર અને 77 પોલીસ ઓબ્ઝર્વરની નિમણૂક કરી છે. આ તમામ નિમણૂકો ભારતના બંધારણની કલમ 324 અને લોક પ્રતિનિધિત્વ અધિનિયમ, 1951ની કલમ 20B હેઠળ આપવામાં આવેલી સત્તાના આધારે કરવામાં આવી છે.

ચૂંટણી પંચની સૂચના મુજબ, આ ઓબ્ઝર્વર્સ કમિશનના સીધા નિયંત્રણ અને દેખરેખ હેઠળ કામ કરશે. ખાસ કરીને જે 165 વિધાનસભા મતવિસ્તારોમાં એકથી વધુ કાઉન્ટિંગ હોલ છે, ત્યાં મુખ્ય કાઉન્ટિંગ ઓબ્ઝર્વરને સહાય કરવા માટે વધારાના ઓબ્ઝર્વર મુકાયા છે. પોલીસ ઓબ્ઝર્વરોને ફાળવવામાં આવેલા મતવિસ્તારોમાં સુરક્ષા વ્યવસ્થા પંચની માર્ગદર્શિકા મુજબ છે કે નહીં તેની ખાતરી કરવાની રહેશે. જોકે, પોલીસ ઓબ્ઝર્વરો કોઈપણ સંજોગોમાં મતગણતરીના દિવસે કાઉન્ટિંગ હોલની અંદર પ્રવેશ કરી શકશે નહીં. તેઓ કાઉન્ટિંગ ઓબ્ઝર્વર્સ અને અન્ય ચૂંટણી તંત્ર સાથે ગાઢ સંકલન જાળવીને કાર્ય કરશે.

મતગણતરીની પારદર્શિતા અને સુરક્ષા સુનિશ્ચિત કરવા માટે ECINet દ્વારા સમર્પિત મોડ્યુલ હેઠળ RO (રિટર્નિંગ ઓફિસર) દ્વારા તમામ કર્મચારીઓ, ઉમેદવારો અને એજન્ટો માટે ઓળખપત્રો જાળી કરવામાં આવશે. મતગણતરી કેન્દ્રોમાં પ્રવેશ ફક્ત ક્યુઆર કોડ આધારિત ફોટો આઈડી દ્વારા જ આપવામાં આવશે. નિયમો મુજબ, કાઉન્ટિંગ ઓબ્ઝર્વર અને રિટર્નિંગ ઓફિસર સિવાય અન્ય કોઈપણ વ્યક્તિને કાઉન્ટિંગ હોલની અંદર મોબાઈલ ફોન લઈ જવાની પરવાનગી આપવામાં આવશે નહીં.

મતગણતરી દરમિયાન કંટ્રોલ યુનિટના પરિણામો ફોર્મ 17C-II માં કાઉન્ટિંગ એજન્ટોની હાજરીમાં તૈયાર કરવામાં આવશે અને જો એજન્ટો ઈચ્છશે તો તેમની સહીઓ માટે આ ડેટા તેમની સાથે શેર કરવામાં આવશે. દરેક ટેબલ પર તૈનાત માઈક્રો ઓબ્ઝર્વર્સ સ્વતંત્ર રીતે સીયુ (CU) ડિસ્પ્લે પરથી પરિણામ નોંધશે અને ક્રોસ-વેરિફિકેશન માટે દરેક રાઉન્ડના અંતે કાઉન્ટિંગ ઓબ્ઝર્વરને સોંપશે. ડેપ્યુટી ડાયરેક્ટર પી. પવન દ્વારા જારી કરાયેલ આ યાદીનો મુખ્ય ઉદ્દેશ્ય ભયમુક્ત, શાંતિપૂર્ણ અને પારદર્શક વાતાવરણમાં ચૂંટણી પ્રક્રિયા પૂર્ણ કરવાનો છે.