નવી દિલ્હી, તા.૦૫: ભારતીય ચૂંટણી પંચ દ્વારા આજે ૬ રાજ્યો અને કેન્દ્રશાસિત પ્રદેશોમાં મતદાર યાદીઓને વધુ સચોટ અને અદ્યતન બનાવવા માટે 'સ્પેશિયલ સમરી રિવિઝન' (SSR) હાથ ધરવાની સત્તાવાર જાહેરાત કરવામાં આવી છે. આ મહત્વપૂર્ણ નિર્ણય અંતર્ગત અરૂણાચલ પ્રદેશ, ચંદીગઢ, દાદરા અને નગરહવેલી તથા દમણ અને દીવ, મિઝોરમ, ઓડિશા અને સિક્કિમનો સમાવેશ કરવામાં આવ્યો છે. આ સમગ્ર કવાયતનો મુખ્ય હેતુ ૧૮ વર્ષ કે તેથી વધુ વયના તમામ લાયક નાગરિકો, ખાસ કરીને યુવાનો અને પ્રથમ વખત મતદાન કરનારાઓને મતદાર યાદીમાં ઉમેરવાનો છે.

આ પ્રક્રિયાના સમયપત્રક અંગે વિગતે વાત કરવામાં આવે તો સંબંધિત રાજ્યો અને કેન્દ્રશાસિત પ્રદેશોમાં ૩૦ નવેમ્બરના રોજ ડ્રાફ્ટ મતદાર યાદી જાહેર કરવામાં આવશે. ત્યારબાદ નાગરિકો પોતાના નવા નામ નોંધાવવા, સરનામા બદલવા કે વાંધા-અરજીઓ દાખલ કરી શકશે. તમામ દાવાઓ અને વાંધાઓના નિરાકરણ બાદ ૨૧ જાન્યુઆરી, ૨૦૨૭ના રોજ આખરી (ફાઈનલ) મતદાર યાદી સત્તાવાર રીતે પ્રકાસિત કરવામાં આવશે.

નવા અને યુવા મતદાતાઓને પ્રોત્સાહિત કરવા માટે ચૂંટણી પંચ દ્વારા એક વિશેષ સુવિધા પૂરી પાડવામાં આવી છે. જે નાગરિકોની ઉંમર ૧ એપ્રિલ, ૧ જુલાઈ અથવા ૧ ઓક્ટોબર ૨૦૨૭ સુધીમાં ૧૮ વર્ષ પૂર્ણ થતી હોય, તેઓ અત્યારથી જ એડવાન્સમાં અરજી કરી શકશે. આ આગોતરી સુવિધાને કારણે લાયક યુવાનોને સમયસર મતદાર યાદીમાં સ્થાન મેળવવામાં ઘણી સરળતા રહેશે.

સ્પેશિયલ સમરી રિવિઝન (SSR) એ ચૂંટણી પંચની એક નિયમિત અને અત્યંત મહત્વપૂર્ણ વહીવટી પ્રક્રિયા છે. આ ઝુંબેશ દરમિયાન ૧૮ વર્ષ પૂર્ણ કરનાર નવા મતદારોના નામ ઉમેરવામાં આવે છે. આ સાથે મૃત્યુ પામેલા નાગરિકો, અન્ય સ્થળે કાયમી ધોરણે સ્થળાંતર કરી ગયેલા લોકો અને ડુપ્લિકેટ કે નકલી મતદારોના નામ યાદીમાંથી કાયદેસર રીતે દૂર કરવામાં આવે છે.

આ ઉપરાંત, જે મતદારોના નામ, અટક, સરનામું, જન્મતારીખ કે ફોટોગ્રાફમાં કોઈ ભૂલ કે સુધારો હોય, તેઓ પણ આ પ્રક્રિયા દરમિયાન જરૂરી પુરાવા રજૂ કરીને પોતાની વિગતો અપડેટ કરાવી શકે છે. આ કામગીરીથી લોકશાહીની પાયાની પ્રક્રિયા ગણાતી મતદાર યાદી સંપૂર્ણપણે નિર્દોષ અને પારદર્શક બને છે.

ચૂંટણી પંચે આ મહત્વાકાંક્ષી અને વ્યાપક પ્રક્રિયાને નિષ્પક્ષ તેમજ સમયસર પૂર્ણ કરવા માટે સંબંધિત ચૂંટણી અધિકારીઓને નિર્દેશો આપ્યા છે. તમામ કેન્દ્રો પર પૂરતી સંખ્યામાં માનવબળ અને જરૂરી ટેકનોલોજીકલ સંસાધનો તૈનાત કરવાનો આદેશ આપવામાં આવ્યો છે, જેથી નાગરિકોને કોઈપણ પ્રકારની અગવડ વગર સરળતાથી સેવાનો લાભ મળી શકે.