હાથીએ ૧૪ વર્ષમાં એક જ પરિવાર પર બે વાર હુમલો કરી વંશ પતાવી નાખ્યો
નેપાળમાં કિલર હાથી! ૧૪ વર્ષમાં એક જ પરિવારના ચાર સભ્યોને મારી નાખ્યા
જગતપુર,તા.૦૯: નેપાળના ચિતવન રાષ્ટ્રીય ઉદ્યાન નજીક માનવ-વન્યજીવન સંઘર્ષની વધુ એક ગંભીર ઘટના નોંધાઈ છે. ૫ જુલાઈની રાત્રે, ચિતવનના જગતપુર વિસ્તારમાં, એક જંગલી હાથીએ એક ઘર પર હુમલો કર્યો, જેમાં ૨૫ વર્ષની મહિલા અને તેના ચાર વર્ષના પુત્રનું મોત નીપજ્યું. સ્થાનિક રીતે ‘ધુર્બે‘ તરીકે ઓળખાતા આ હાથીને નેપાળનો સૌથી ખતરનાક ‘કિલર હાથી‘ માનવામાં આવે છે. હુમલા પછી, હાથી જંગલમાં પાછો ભાગી ગયો; વન વિભાગ હાલમાં તેની શોધ કરી રહ્યું છે અને તેની ગતિવિધિઓ પર નજર રાખી રહ્યું છે.
આ પરિવાર પહેલા પણ આ જ હાથીનો શિકાર બની ચૂક્યો છે. પરિવારના સભ્ય શનિચરા બોટેના જણાવ્યા અનુસાર, ૧૬ ડિસેમ્બર, ૨૦૧૨ ના રોજ, આ જ હાથીએ ચિતવન રાષ્ટ્રીય ઉદ્યાન નજીક તેના માતાપિતા બુધિરામ બોટે અને ઝારાલી બોટેને કચડી નાખ્યા હતા. તે ઘટના બાદ, પરિવારે તેમની મિલકત વેચી દીધી અને બે મુખ્ય નદીઓ પાર કર્યા પછી, લગભગ ૧૭ કિલોમીટર દૂર સ્થિત જગતપુરમાં એક નવું ઘર બનાવ્યું. શનિચરા બોટેએ જણાવ્યું, અમે વિચાર્યું હતું કે મુખ્ય નદીઓ પાર કરીને અને બીજી જગ્યાએ રહીને, આપણે સુરક્ષિત રહીશું. પરંતુ આટલા વર્ષો પછી, તે જ હાથી અમારા નવા ઘરમાં પહોંચ્યો, તેણે હુમલો કર્યો અને મારી પુત્રવધૂ અને મારા નાના પૌત્રનો જીવ લીધો.
ઘટનાની રાત્રે, શનિચરા બોટેની પત્નીએ સૌ પ્રથમ ઘરની દિવાલ સામે જોરદાર અવાજ સાંભળ્યો. થોડીવાર પછી, હાથી માટીની દિવાલ તોડી નાખ્યો. પરિવારના સભ્યોએ પોતાનો જીવ બચાવવા ભાગવાનો પ્રયાસ કર્યો, પરંતુ હાથીએ તેની ૨૫ વર્ષની પુત્રવધૂ અને ચાર વર્ષના પૌત્રને પકડીને કચડી નાખ્યા. બાદમાં, બોટેની પત્ની સૂકા ઘાસમાં આગ લગાવીને હાથીને ભગાડવામાં સફળ રહી, પરંતુ આગથી પરિવારના ઘરને મોટું નુકસાન થયું.
ચિતવન રાષ્ટ્રીય ઉદ્યાનના રેકોર્ડ મુજબ, ધુરબેએ ૨૦૧૦ માં પહેલો માનવ જીવ લીધો હતો. આજ સુધી, ઓછામાં ઓછા ૨૫ લોકોના મૃત્યુ માટે તેને જવાબદાર ગણવામાં આવે છે. આમાં સનિચરા બોટેના પરિવારના ચાર સભ્યોનો સમાવેશ થાય છે. વધુમાં, હાથીએ પાર્ક સુરક્ષા અને શિકાર વિરોધી કામગીરી માટે તહેનાત બે લશ્કરી કર્મચારીઓના જીવ લીધા છે. ૨૦૧૨ માં, હાથીએ એક જ દિવસમાં ૬૮ ઘરોને નુકસાન પહોંચાડ્યું. વારંવારના હુમલાઓ બાદ, નેપા સરકારે તેને મારવા માટે ખાસ પરવાનગી આપી. સેના અને વન વિભાગે તેને શોધવા માટે એક ઑપરેશન શરૂ કર્યું; મિશન દરમિયાન હાથી ઘાયલ થયો હોવા છતાં, તે જંગલમાં ભાગી જવામાં સફળ રહ્યો. અધિકારીઓએ શરૂઆતમાં માન્યું હતું કે તે મૃત્યુ પામ્યો છે, પરંતુ તે ૨૦૧૬ માં ફરીથી દેખાયો. બાદમાં, તેના પર નજર રાખવા માટે તેના ગળામાં સેટેલાઇટ ટ્રેકિગ કોલર ફીટ કરવામાં આવ્યો હતો.
(10:06 AM IST)
છેલ્લા 8 દિવસમાં સૌથી લોકપ્રિય 
