અલીગઢ : ઉત્તરપ્રદેશના અલીગઢ જિલ્લામાં આજે સવારે એક મોટી દુર્ઘટના ટળી ગઈ છે. ધાનીપુર એરપોર્ટ પરથી ટ્રેનિંગ માટે ઉડાન ભરનાર એક નાના વિમાનને ટેકનિકલ ખામી સર્જાતા પાયલોટે ખેતરમાં ઈમરજન્સી લેન્ડિંગ કરાવવું પડ્યું હતું. 

 

પ્રાપ્ત માહિતી મુજબ, VT-PFB રજિસ્ટ્રેશન નંબર ધરાવતું આ ટ્રેનિંગ એરક્રાફ્ટ ધાનીપુર એરપોર્ટ પરથી સવારે લગભગ 10:30 વાગ્યે ઉડાન ભર્યા બાદ થોડી જ મિનિટોમાં વિમાનમાં ટેકનિકલ ખામી જણાઈ આવી હતી. પાયલોટે તાત્કાલિક સૂઝબૂઝ દાખવીને એરપોર્ટ નજીક આવેલા એક ખુલ્લા ખેતરમાં સફળતાપૂર્વક ઈમરજન્સી લેન્ડિંગ કરાવી દીધું હતું. વિમાનમાં પાયલોટ ઉપરાંત એક ટ્રેની પાયલોટ પણ સવાર હતો અને બંને સંપૂર્ણપણે સુરક્ષિત છે. 

 

ઘટનાસ્થળે ભીડ જમા થઈ

 

ખેતરમાં વિમાન ઉતરતાની સાથે જ આસપાસના ગામોમાંથી મોટી સંખ્યામાં લોકો ઘટનાસ્થળે દોડી આવ્યા હતા. પોલીસ અને એરપોર્ટ ઓથોરિટીની ટીમ પણ તાત્કાલિક ઘટનાસ્થળે પહોંચી ગઈ હતી અને વિમાનને કોર્ડન કરી દીધું હતું. સદનસીબે વિમાનને આગ લાગી ન હતી અને કોઈ જાનહાનિ થઈ નથી.

 

 

DGCA તપાસ કરશે

 

 

ડિરેક્ટોરેટ જનરલ ઓફ સિવિલ એવિએશન (DGCA)એ આ ઘટનાની ગંભીર નોંધ લઈને તપાસના આદેશ આપી દીધા છે. પ્રાથમિક અનુમાન મુજબ એન્જિનમાં ખામી સર્જાવાને કારણે આ ઘટના બની હોઈ શકે છે. વિમાન કઈ ખાનગી ફ્લાઈંગ એકેડમીનું હતું તેની તપાસ ચાલુ છે. DGCAની ટીમ ટેકનિકલ ટીમ સાથે ઘટનાસ્થળે પહોંચીને વિમાનની તપાસ કરશે. 

 

 

પાયલોટની બહાદુરીની ચર્ચા

 

 

સ્થાનિક લોકો અને અધિકારીઓ પાયલોટની સમયસૂચકતા અને બહાદુરીના વખાણ કરી રહ્યા છે. જો પાયલોટે સમયસર નિર્ણય ન લીધો હોત તો વિમાન રહેણાંક વિસ્તારમાં ક્રેશ થઈ શકતું હતું અને મોટી જાનહાનિ થઈ શકતી હતી. હાલમાં એરપોર્ટ ઓથોરિટીએ વિમાનને ખેતરમાંથી ખસેડવાની કાર્યવાહી શરૂ કરી છે.