ગ્રેટર નોઇડા : ભારતને ઇલેક્ટ્રોનિક્સ મેન્યુફેક્ચરિંગ ક્ષેત્રે વૈશ્વિક મહાસત્તા બનાવવા અને પડોશી દેશ ચીન પરની આયાત નિર્ભરતાને કાયમ માટે ખતમ કરવા તરફ ઉત્તર પ્રદેશ સરકારે એક મોટું અને ઐતિહાસિક પગલું ભર્યું છે. યમુના ઓથોરિટી વિસ્તારના સેક્ટર ૮ અને સેક્ટર ૧૦ માં ટૂંક સમયમાં બે પ્રચંડ પ્રિન્ટેડ સર્કિટ બોર્ડ (PCB) ઉત્પાદન એકમો સ્થાપવા જઈ રહ્યા છે. શનિવારે મુખ્યમંત્રી યોગી આદિત્યનાથ આ મેગા પ્રોજેક્ટ્સનો સત્તાવાર શિલાન્યાસ કરશે, જેમાં કુલ ₹૬,૭૮૦ કરોડનું જંગી મૂડીરોકાણ કરવામાં આવશે.

૯૫ ટકા ચીની આયાત પર વાગશે બ્રેક

હાલની સ્થિતિએ ભારતમાં પીસીબી પેનલના ઉત્પાદન એકમો ખૂબ જ મર્યાદિત સંખ્યામાં છે. દેશભરમાં ડિજિટલ ઉપકરણો માટે વપરાતા PCB ની કુલ માંગના ૯૫ ટકા કરતાં પણ વધુ હિસ્સો ચીનથી થતી આયાત પર આધારિત છે. સ્માર્ટફોનથી લઈને સ્પેસ ટેકનોલોજી સુધીની ભારતીય ઇકોસિસ્ટમ માટે આ એક મોટું જોખમ હતું. પરંતુ, આ નવા એકમો શરૂ થવાથી અને પ્રદેશમાં સેમિકન્ડક્ટર પ્લાન્ટના આધુનિક વિસ્તરણથી વિદેશી નિર્ભરતા સંપૂર્ણપણે દૂર થશે અને ભારત સાચા અર્થમાં આત્મનિર્ભરતા તરફ આગળ વધશે.

ઇલેક્ટ્રોનિક્સ ઉપકરણોની 'જીવનરેખા' છે PCB:

ઇલેક્ટ્રોનિક્સ ક્ષેત્રના અગ્રણી ઉદ્યોગસાહસિક વિનીત ગોયલના જણાવ્યા અનુસાર, પીસીબી (Printed Circuit Board) એ કોઈપણ ઇલેક્ટ્રોનિક ઉપકરણનું મગજ અથવા જીવનરેખા છે. તે તમામ આંતરિક સિગ્નલોને રૂટ કરે છે, લઘુ ઘટકોને સપોર્ટ આપે છે અને ડિવાઇસની સ્પીડ તેમજ કાર્યક્ષમતા નક્કી કરે છે. આજે ઓટોમોટિવ (ઈવી વાહનો), ટેલિકોમ્યુનિકેશન (5G નેટવર્ક), કન્ઝ્યુમર ઇલેક્ટ્રોનિક્સ અને રીન્યુએબલ એનર્જી (સૌર ઉર્જા) જેવા દરેક આધુનિક ક્ષેત્રમાં તેની અનિવાર્ય જરૂરિયાત છે.

રોકાણકારોની પહેલી પસંદ અને નવી રોજગારીનો સૂર્યોદય

ગૌતમ બુદ્ધ નગર (નોઇડા) તેની ભૌગોલિક સ્થિતિ, દિલ્હીની નિકટતા, ઉત્તમ એક્સપ્રેસવે કનેક્ટિવિટી અને રાજ્ય સરકારની ઉદાર ESDM નીતિના કારણે રોકાણકારો માટે હોટસ્પોટ બન્યું છે. ઉદ્યોગના ડેપ્યુટી કમિશનર પંકજ નિર્વાણે જણાવ્યું કે, આ બે નવા પ્રોજેક્ટ્સના કારણે જિલ્લામાં હજારો પ્રત્યક્ષ અને પરોક્ષ રોજગારીની તકો ઊભી થશે અને આનુષંગિક (સપોર્ટિવ) ઉદ્યોગોને પણ જબરદસ્ત બૂસ્ટ મળશે. કેન્દ્ર સરકારના 'સેમિકન્ડક્ટર મિશન' સાથે જોડાઈને આ નવો મેગા પીસીબી પ્લાન્ટ ભારતને વૈશ્વિક સપ્લાય ચેઇનનો એક અવિભાજ્ય હિસ્સો બનાવશે અને વૈશ્વિક બજારમાં ચીનના વર્ચસ્વને કડક પડકાર ફેંકશે.