દુબઈ:પશ્ચિમ એશિયાના રણમેદાનમાં ચાલી રહેલા તણાવ વચ્ચે હોર્મુઝની સામુદ્રધુનીમાં સર્જાયેલી નાકાબંધીએ વૈશ્વિક અર્થતંત્રના પાયા હચમચાવી દીધા છે. સંયુક્ત આરબ અમીરાત (UAE) ના વિદેશ મંત્રાલયના રાજ્યમંત્રી સઈદ બિન મુબારક અલ હજેરીએ એક મહત્વપૂર્ણ નિવેદનમાં આ પ્રક્રિયાને 'આર્થિક આતંકવાદ' ગણાવ્યો છે. તેમણે સ્પષ્ટ ચેતવણી આપી છે કે હોર્મુઝ જેવો વ્યૂહાત્મક જળમાર્ગ બંધ થવો એ માત્ર પ્રાદેશિક મુદ્દો નથી, પરંતુ તે ભારત જેવા મોટા અર્થતંત્રો પર પણ સીધી અને ઘાતક અસર કરી રહ્યો છે. ભારત માટે આ ચિંતાનો વિષય એટલે છે કારણ કે તેના મોટાભાગના તેલ ટેન્કરો અને વેપારી જહાજો આ જ માર્ગે પસાર થાય છે, જે હવે સંકટના વાદળો નીચે ઘેરાયા છે.

અમેરિકા અને ઈરાન વચ્ચે ૩૯ દિવસ સુધી ચાલેલા લોહિયાળ જંગ બાદ હાલમાં યુદ્ધવિરામ અને વાટાઘાટોનો દોર શરૂ થયો છે, પરંતુ યુએઈના મંત્રી માને છે કે માત્ર શસ્ત્રવિરામ પૂરતો નથી. તેમણે ભારપૂર્વક જણાવ્યું કે જ્યાં સુધી ઈરાન દ્વારા ઉભા કરવામાં આવેલા સંપૂર્ણ જોખમોનો કાયમી ઉકેલ નહીં આવે ત્યાં સુધી આર્થિક સ્થિરતા અશક્ય છે. હોર્મુઝ સ્ટ્રેટને ફરીથી ખોલવા અંગેની ચર્ચાઓ અત્યંત નાજુક તબક્કામાં છે. ઈરાન તેની દુશ્મનાવટનો સંપૂર્ણ અંત લાવે અને દરિયાઈ વેપાર પરના નિયંત્રણો હટાવે તે માટે આંતરરાષ્ટ્રીય સમુદાય દબાણ કરી રહ્યો છે. આ જળમાર્ગ બંધ રહેવાથી ઉર્જા સંકટ ઘેરાયું છે અને શિપિંગ ઉદ્યોગમાં મોટી નાકાબંધી સર્જાઈ છે.

આ સંઘર્ષની સૌથી મોટી માનવીય અને આર્થિક અસર યુએઈમાં વસતા લાખો ભારતીય સમુદાય પર પણ પડી રહી છે. સઈદ અલ હજેરીએ સ્વીકાર્યું હતું કે અખાતી દેશોમાં ભારતીયોની સુરક્ષા અને તેમના હિતો યુએઈ માટે પ્રાથમિકતા છે. વર્તમાન પરિસ્થિતિમાં દરિયાઈ વેપાર અટકી જવાથી ભારત-UAE વચ્ચેના સપ્લાય ચેઈન અને વેપાર સંબંધો પર નકારાત્મક અસર પડી છે. હવે જોવાનું એ રહેશે કે આગામી દિવસોમાં થનારી વાટાઘાટોમાં હોર્મુઝના દરવાજા ફરી ક્યારે ખુલે છે અને વિશ્વને આ 'આર્થિક આતંકવાદ' માંથી ક્યારે મુક્તિ મળે છે. ઈઝરાયેલ-યુએસ અને ઈરાન વચ્ચેના આ ત્રિકોણીય જંગમાં ભારતની ભૂમિકા અને તેની ઉર્જા સુરક્ષા અત્યારે સૌથી મોટા પ્રશ્નાર્થ ચિન્હ સમાન છે.