નવી દિલ્હી:ભારતની દરિયાઈ સંરક્ષણ ક્ષમતાઓને વધુ મજબૂત અને અભેદ્ય બનાવવાના ઉદ્દેશ્ય સાથે સરકારે આજે એક મોટી ઐતિહાસિક સિદ્ધિ હાંસલ કરી છે. વડાપ્રધાન નરેન્દ્રભાઈ મોદીએ દેશમાં જ સંપૂર્ણ સસ્વદેશી ટેકનોલોજીથી તૈયાર કરવામાં આવેલા ત્રણ અત્યાધુનિક યુદ્ધજહાજો- 'દુનાગિરી', 'સંશોધક' અને 'અગ્રય' ને વિધિવત રીતે ભારતીય નૌકાદળના કાફલામાં સામેલ (કમિશન) કર્યા છે. આ ત્રણેય નવા વોરશિપ્સના આગમનથી હિંદ મહાસાગર અને ભારતીય દરિયાઈ સરહદો પર દેશની સૈન્ય શક્તિ સબળ બનશે.

આ ભવ્ય કમિશનિંગ કાર્યક્રમ દરમિયાન રજૂ કરાયેલી વિગતો મુજબ, આ ત્રણેય યુદ્ધજહાજો ભારત સરકારના 'મેક ઇન ઇન્ડિયા' અને 'આત્મનિર્ભર ભારત' વિઝનનું સર્વોત્તમ ઉદાહરણ છે. આ જહાજોની ડિઝાઇનથી લઈને તેના નિર્માણમાં વપરાયેલું મોટાભાગનું મટીરિયલ અને ઘાતક હથિયારો સંપૂર્ણપણે ભારતીય કંપનીઓ અને નૌસેનાના એન્જિનિયરો દ્વારા સ્વદેશી સ્તરે જ વિકસાવવામાં આવ્યા છે, જે ભારતીય સંરક્ષણ ઉદ્યોગની સ્વનિર્ભરતા દર્શાવે છે.

આ ત્રણેય જહાજો પોતાની અલગ-અલગ વિશેષતાઓ ધરાવે છે. 'દુનાગિરી' અત્યાધુનિક મિસાઇલો અને રડાર સિસ્ટમથી સજ્જ એક શક્તિશાળી સ્ટીલ્થ ફ્રિગેટ છે, જે દુશ્મનની નજરમાં આવ્યા વિના હુમલો કરવા સક્ષમ છે. જ્યારે 'સંશોધક' એ વિશાળ હાઇડ્રોગ્રાફિક સર્વે જહાજ છે જે સમુદ્રની અંદર દુશ્મનની હિલચાલ અને સબમરીન પર નજર રાખવામાં નૌસેનાને મદદ કરશે. તેમજ 'અગ્રય' એ કટોકટીના સમયે ઝડપી આક્રમણ અને એન્ટી-સબમરીન વોરફેર કામગીરી માટે અતિ ઉપયોગી નૌકા છે.

નૌકાદળના ઉચ્ચ અધિકારીઓના જણાવ્યા અનુસાર, વર્તમાન વૈશ્વિક અને પ્રાદેશિક સુરક્ષાના પડકારોને જોતા આ સ્વદેશી યુદ્ધજહાજોનો સમાવેશ ખૂબ જ મહત્વપૂર્ણ સાબિત થશે. વડાપ્રધાન નરેન્દ્રભાઈ મોદીએ આ અવસરે દેશના વૈજ્ઞાનિકો, એન્જિનિયરો અને શિપબિલ્ડર્સની પ્રશંસા કરતા જણાવ્યું હતું કે, આ આધુનિક જહાજો માત્ર દેશની રક્ષા જ નહીં કરે, પરંતુ વૈશ્વિક સ્તરે જહાજ નિર્માણના ક્ષેત્રમાં ભારતની વધતી ક્ષમતાનો મજબૂત પરિચય પણ આપશે.