નવી દિલ્‍હી,તા.૫: કેળું દુનિયાના સૌથી લોકપ્રિય ફ્રુટમાંનું એક છે. સામાન્‍ય રીતે બજારમાં મળતું કેળું ૬થી ૯ ઇંચ લાંબું હોય છે, જેને આપણે રોજ ખાઈએ છીએ, પરંતુ શું તમે ક્‍યારેય એવું કેળું જોયું છે, જેનું કદ એટલું મોટું હોય કે તેને ઇંચમાં નહીં, પરંતુ ફૂટમાં માપવું પડે? હાલ સોશિયલ મીડિયા પર આવો જ એક વીડિયો ઝડપથી વાયરલ થઈ રહ્યો છે, જેને જોઈને લોકો આશ્ચર્ય વ્‍યક્‍ત કરી રહ્યા છે.

વાયરલ વીડિયોમાં એક યુવક પોતાના હાથમાં ખૂબ જ મોટું કેળું પકડેલો જોવા મળે છે. કેળાનું કદ એટલું મોટું દેખાય છે કે પહેલી નજરે લોકોને પોતાની આંખો પર વિશ્વાસ કરવો મુશ્‍કેલ થઈ જાય છે. વીડિયોમાં યુવક આ મોટું કેળું બતાવતો અને તેને ખાવાની કોશિશ કરતો પણ જોવા મળે છે. આ જ કારણ છે કે આ વીડિયો ઇન્‍ટરનેટ પર ઝડપથી લોકોનું ધ્‍યાન ખેંચી રહ્યો છે.

આ વીડિયો સોશિયલ મીડિયા પ્‍લેટફોર્મ X પર @Rainmaker1973 નામના એકાઉન્‍ટ પરથી શેર કરવામાં આવ્‍યો છે. આ પોસ્‍ટને લાખો વખત જોવામાં આવી છે, જ્‍યારે હજારો લોકો તેને લાઈક કરી ચૂક્‍યા છે. કોમેન્‍ટમાં પણ લોકો આ વિશાળ કેળાને જોઈને અલગ-અલગ પ્રતિક્રિયાઓ આપી રહ્યા છે. કોઈ તેને પ્રકૃતિનો અનોખો ચમત્‍કાર ગણાવી રહ્યું છે તો કોઈ મજાકિયા અંદાજમાં કહી રહ્યું છે કે એક જ કેળું આખા પરિવારનું પેટ ભરી શકે છે.

વાયરલ વીડિયો સાથે આપવામાં આવેલી માહિતી અનુસાર, આ કોઈ સામાન્‍ય કેળું નથી, પરંતુ Musa ingens નામની એક દુર્લભ જંગલી પ્રજાતિ છે. તેને Giant Highland Banana એટલે કે વિશાળ હાઈલેન્‍ડ કેળું પણ કહેવામાં આવે છે. આ પ્રજાતિ મુખ્‍યત્‍વે ન્‍યૂ ગિનીના ઊંચા અને ગાઢ પર્વતીય વિસ્‍તારોમાં કુદરતી રીતે જોવા મળે છે અને દુનિયાના અન્‍ય ભાગોમાં ખૂબ જ ઓછી જોવા મળે છે.

કહેવાય છે કે આ પ્રજાતિનો છોડ ૨૦થી ૨૫ મીટર એટલે કે લગભગ ૬૫થી ૮૨ ફૂટ સુધી ઊંચો થઈ શકે છે. તેની ઊંચાઈ ઘણા મોટા વૃક્ષો જેટલી હોય છે અને તેનું થડ પણ ઘણું જાડું હોય છે. દૂરથી જોતા તે કોઈ વૃક્ષ જેવો દેખાય છે, જ્‍યારે બોટની પ્રમાણે તે કેળાની જ એક પ્રજાતિ છે.

નિષ્‍ણાતોના જણાવ્‍યા અનુસાર, આ છોડ પર લાગતાં ફળ દેખાવમાં સામાન્‍ય કેળાં જેવા જ હોય છે, પરંતુ તેની અંદર રહેલાં બીજ સામાન્‍ય કેળાની સરખામણીમાં ઘણા મોટા અને કઠણ હોય છે. આ જ કારણ છે કે તેને સામાન્‍ય કેળાની જેમ સરળતાથી ખાઈ શકાતું નથી.