નવી દિલ્‍હી,તા.૦૬: ફૂટબોલ વર્લ્‍ડ કપમાં મોટો અપસેટ જોવા મળ્‍યો છે. એક નાના યુરોપિયન દેશ નોર્વેએ પ્રી-ક્‍વાર્ટર ફાઇનલમાં પાંચ વખતના ચેમ્‍પિયન બ્રાઝિલને હરાવીને હંગામો મચાવ્‍યો છે. નોર્વેની ટીમ પહેલીવાર ફૂટબોલ વર્લ્‍ડ કપના ક્‍વાર્ટર ફાઇનલમાં પહોંચી છે. માત્ર ૫૬ લાખની વસ્‍તી ધરાવતો નોર્વે વિશ્વના સૌથી ધનિક દેશોમાંનો એક માનવામાં આવે છે. માનવ વિકાસ સૂચકાંકમાં તે ટોચના દેશોમાં સ્‍થાન ધરાવે છે. નોર્વે તેની આવક ક્‍યાંથી મેળવે છે?

નોર્વે સ્‍કેન્‍ડિનેવિયન દેશોમાંનો એક છે, જેમાં સ્‍વીડન અને ડેનમાર્કનો સમાવેશ થાય છે. નોર્વેનો કુલ વિસ્‍તાર ૩૮૫,૨૦૭ ચોરસ કિલોમીટર છે. મુખ્‍ય ભૂમિ વિસ્‍તાર ૩૨૩,૮૦૨ ચોરસ કિલોમીટર છે, જ્‍યારે ટાપુઓ ૬૧,૪૨૫ ચોરસ કિલોમીટરને આવરી લે છે. નોર્વેનું અર્થતંત્ર ખૂબ જ સમૃદ્ધ અને મિશ્ર કલ્‍યાણકારી અર્થતંત્ર માનવામાં આવે છે. તેનો GDP આશરે US$500 બિલિયન છે. તેનો માથાદીઠ GDP US$105,877 છે, જે ભારતીય રૂપિયામાં આશરે રૂ.૧૦,૧૦૨,૮૩૦ થાય છે.

નોર્વેનો સૌથી મોટો આવકસ્ત્રેત ઉત્તર સમુદ્રમાંથી નીકળતું તેલ અને ગેસ છે. નોર્વે યુરોપનો સૌથી મોટો તેલ અને કુદરતી ગેસનો ઉત્‍પાદક અને નિકાસકાર છે. પેટ્રોલિયમ ક્ષેત્ર દેશના કુલ નિકાસના ૪૦% થી વધુ હિસ્‍સો ધરાવે છે. નોર્વેની મોટાભાગની નિકાસ યુનાઇટેડ કિગડમ, જર્મની અને નેધરલેન્‍ડ્‍સમાં થાય છે. નોર્વે વિશ્વમાં કુદરતી ગેસનો ત્રીજો સૌથી મોટો નિકાસકાર દેશ છે. આ દેશ દરરોજ આશરે ૨ મિલિયન બેરલનું ઉત્‍પાદન કરે છે. નોર્વે વિશ્વમાં ક્રૂડ ઓઇલનો ૧૨મો સૌથી મોટો ઉત્‍પાદક દેશ છે.

જોકે, તેલ અને ગેસ પર વધુ પડતી નિર્ભરતા નોર્વેના અર્થતંત્ર માટે માળખાકીય જોખમ ઊભું કરે છે. અશ્‍મિભૂત ઇંધણનો ઉપયોગ ઘટાડવા માટે વૈશ્વિક ઝુંબેશ ચાલી રહી છે. આનાથી તેલ અને ગેસ આધારિત દેશોની અર્થવ્‍યવસ્‍થા પણ જોખમમાં મુકાઈ છે. આ જ કારણ છે કે તેઓ તેમના અર્થતંત્રમાં વૈવિધ્‍ય લાવવા માટે કામ કરી રહ્યા છે. નોર્વે તેના ભવિષ્‍યને સુરક્ષિત કરવા માટે નવીનતા, ઉત્‍પાદકતા અને લીલા ઉદ્યોગોને પણ પ્રોત્‍સાહન આપી રહ્યું છે