ન્યૂ યોર્ક, તા.30: 11 સપ્ટેમ્બર, 2001 ના રોજ ન્યૂ યોર્ક સિટી પર થયેલા ભયાનક આતંકવાદી હુમલાની 25મી વાર્ષિક પુણ્યતિથિ નજીક આવી રહી છે ત્યારે અમેરિકી રાજકારણ અને હોલિવૂડમાં મોટો વિવાદ છેડાયો છે. પ્રખ્યાત ટીવી શો ‘એવરીબડી લવ્સ રેમન્ડ’ ની લોકપ્રિય અભિનેત્રી પેટ્રિશિયા હીટન (Patricia Heaton) 9/11 ના પીડિત પરિવારો સાથે જોડાઈ છે અને ન્યૂ યોર્ક શહેરના મેયર ઝોહરાન મમદાની (Zohran Mamdani) ને ગ્રાઉન્ડ ઝીરો ખાતે યોજાનારા સ્મૃતિ સમારોહમાંથી પ્રતિબંધિત કરવાની જોરદાર માંગ કરી છે.
પીડિત પરિવારો દ્વારા શરૂ કરવામાં આવેલી આ પિટિશન પર બુધવાર સુધીમાં આશરે 45,000 થી વધુ લોકોએ હસ્તાક્ષર કરી દીધા છે. 68 વર્ષીય અભિનેત્રી પેટ્રિશિયા હીટને સોશિયલ મીડિયા પ્લેટફોર્મ X પર પોતાના 5 લાખથી વધુ ફોલોઅર્સ સાથે આ પિટિશન શેર કરતાં લખ્યું હતું કે, "ન્યૂ યોર્કવાસીઓ આગળ વધો અને આ પિટિશન પર સહી કરો." 9/11 ના હુમલા વખતે ન્યૂ યોર્કમાં જ હાજર રહેલી હીટને પીડિત પરિવારની ટિપ્પણીનો સ્ક્રીનશોટ પણ શેર કર્યો હતો, જેમાં મમદાની પર આતંકવાદ પ્રત્યે નરમ વલણ રાખવાનો અને આતંકી સહાનુભૂતિ ધરાવવાનો આક્ષેપ કરાયો હતો.
આ પિટિશનનું નેતૃત્વ 9/11 ના હુમલામાં પોતાની પત્ની ગુમાવનાર 55 વર્ષીય જીઓવાન્ની ગાલાન્ટે કરી રહ્યા છે. પીડિત પરિવારોનો આરોપ છે કે મેયર મમદાનીની અમુક વિવાદિત પ્રવૃત્તિઓ અને વિચારધારાઓ આતંકવાદ સામે લડનારા અને જીવ ગુમાવનારા 2,753 નિર્દોષ નાગરિકોની યાદોનું અનાદર કરે છે. બીજી તરફ, મેયર મમદાનીએ આ વિરોધને ફગાવતાં જણાવ્યું હતું કે તેઓ 9/11 ના પીડિતો અને તેમના પરિવારો સાથે ઉભા રહીને સપ્ટેમ્બરમાં ગ્રાઉન્ડ ઝીરો ખાતે શ્રદ્ધાંજલિ આપવા ચોક્કસપણે હાજર રહેશે.